ۆلاديمير پۋتين پرەزيدەنتتىك سايلاۋعا ءتۇسۋى مۇمكىن ەكەنىن ايتتى

ول بۇل تۋرالى «روسسيا-1» تەلەارناسىندا كورسەتىلگەن «رەسەي. كرەمل. پۋتين» فيلمى ءۇشىن بەرگەن سۇحباتتا ايتتى، دەپ حابارلايدى قازاقپارات ت ا س س اگەنتتىگىنە سىلتەمە جاساپ.

«ءوزىم ءۇشىن ءالى شەشىم قابىلدامادىم. ەگەر كونستيتۋتسيادا مۇمكىندىك جاسالسا، سايلاۋعا ءتۇسۋىم تۋرالى ىقتيمالدىلىقتى جوققا شىعارمايمىن. ونى الداعى ۋاقىت كورسەتەدى»، - دەدى ول.

بۇل رەتتە، ۆ. پۋتين شەنەۋنىكتەرگە ونىڭ ءىزىن باساتىن ادامدى قازىردەن ىزدەپ كەتپەي، ءوز جۇمىستارىمەن اينالىسۋدى ەسكەرتتى.

«ءىزباساردى ىزدەۋمەن ەمەس، جۇمىسپەن اينالىسۋ قاجەت»، - دەدى ر ف باسشىسى.

رەسەي پرەزيدەنتى كونستيتۋتسياعا وزگەرىس ەنگىزۋ ۇسىنىسى وتە ورىندى ەكەنىنە سەنىمدى.

«قولدانىستاعى كونستيتۋتسياعا تۇزەتۋلەر قابىلداپ جاتقانىمىز وتە دۇرىس ەكەنىنە كامىل سەنەمىن»، - دەگەن ول، سوڭعى ايلارداعى وقيعالار سوعان دالەل بولا الاتىنىن ايتىپ ءوتتى.

«قازىرگى كونستيتۋتسيا ەرەكشە كەزەڭدە - تانكىلەر پارلامەنتكە وق جاۋدىرىپ، ماسكەۋدە قاقتىعىستار بولىپ جاتقان، وتكىر ىشكى-ساياسي داعدارىس جاعدايىندا قابىلداندى»، - دەپ ەسكە سالدى ول.