لاتۆيادا گۇلدىڭ جاڭا سورتىنا ديماشتىڭ ەسىمى بەرىلدى

ريگا. قازاقپارات - لاتۆيادا تاۋراۋشاننىڭ جاڭا سورتىنا قازاقستاندىق تانىمال ءانشى ديماش قۇدايبەرگەن ەسىمى بەرىلدى، دەپ حابارلايدى قازاقپارات.

«الەمدەگى جالعىز «ديماش قۇدايبەرگەن» ەندى لاتيۆيادا تۇراتىن بولدى! بۇگىن تاۋراۋشانعا (رودودەندرون) تاجىريبە جۇرگىزەتىن «Babi ̄te « ءتالىمباعىنان لاتۆيالىق سەرتيفيكات الدىق. ەندى 2020-جىلدىڭ 24 - مامىرىنان باستاپ، جەر پلانەتاسىندا «ديماش قۇدايبەرگەن» اتتى جاڭا تاۋراۋشان سورتى بار. ءبىر جىلدان كەيىن ديماشتىڭ كەلەسى تۋعان كۇنىندە انگليانىڭ كورولدىك باۋ-باقشا قوعامداستىعىنىڭ تاۋراۋشان بويىنشا حالىقارالىق سەرتيفيكاتى الىنادى دەپ ۇمىتتەنەمىز»، - دەپ جازىلعان ديماشتىڭ لاتۆيالىق جانكۇيەرلەر كلۋبىنىڭ Instagram پاراقشاسىندا.

جانكۇيەرلەر كلۋبىنىڭ حابارلاۋىنشا، ازىرگە بۇل ءتۇپ شىنىندا دا الەم بويىنشا جالعىز، سوندىقتان ول «Babi ̄te « تاۋراۋشاندار ساياباعىنىڭ باستى اللەياسىنا وتىرعىزىلادى جانە سورتتىڭ كىمگە ارنالعاندىعى تۋرالى ارنايى تاقتايشا قويىلادى.

«ءبىراز ۋاقىتتان سوڭ ءتالىمباقتان ونىڭ كوشەتتەرىن الۋعا بولادى. 5-7 جىلدا كىشكەنتاي كوشەت كوركەم ءتۇپ اعاشقا اينالادى. ونىڭ بيىكتىگى 2-3 مەترگە دەيىن جەتەدى جانە 200 جىلعا جۋىق ءومىر سۇرەدى. ديماشقا دا تاۋراۋشاندى سىيعا تارتامىز دەپ ۇمىتتەنەمىز! وعان دا تاۋراۋشان سەكىلدى ۇزاق شىعارماشىلىق عۇمىر تىلەيمىز! جاڭا سورت تا ديماشتىڭ اندەرى سەكىلدى ءاربىر ەلدە بولسىن!»، - دەيدى جانكۇيەرلەر.