قازاقستاندا شەكارادان ءوتۋ ءتارتىبى وزگەردى

نۇر-سۇلتان. قازاقپارات - كارانتيندىك شەكتەۋلەر كەزىندە مەملەكەتتىك شەكارانى كەسىپ ءوتۋ تارتىبىنە وزگەرىستەر ەنگىزىلدى، دەپ حابارلايدى قازاقپارات ق ر ۇلتتىق قاۋىپسىزدىك كوميتەتىنە سىلتەمە جاساپ.

«قازاقستان رەسپۋبليكاسى ۇكىمەتىنىڭ شەشىمىمەن ق ر ازاماتتارىنا تىكەلەي اۋە قاتىناسى قايتا ورناتىلعان شەت مەملەكەتتەرگە شىعۋعا جانە اتالعان ەلدەردىڭ ازاماتتارىنا قازاقستان رەسپۋبليكاسىنا كىرۋگە رۇقسات بەرىلەدى. شەتەلدىكتەر ءۇشىن نەگىزگى شارت - ۆيزالىق تالاپتاردى ساقتاۋ، قازاقستان رەسپۋبليكاسىنا تىكەلەي اۋە قاتىناسى قايتا ورناتىلعان مەملەكەتتەردىڭ ازاماتى بولۋى جانە وسى مەملەكەتتەن تىكەلەي رەيسپەن ءجۇرۋى ءتيىس. وسى تارتىپكە سايكەس ەلگە كىرۋگە رۇقسات ەتىلگەن شەتەلدىكتەر دە ق ر اماعىنا كىرۋ ءۇشىن تىكەلەي اۋە رەيستەرىن پايدالانا الادى»، - دەلىنگەن ق ر ۇ ق ك حابارلاماسىندا.

بۇدان باسقا، قازاقستان رەسپۋبليكاسىنىڭ مەملەكەتتىك شەكاراسىنان وتۋگە:

- قازاقستان رەسپۋبليكاسىنا ەكيپاجدان تىس اۋىسىمعا بارا جاتقان، تەڭىز كەمەلەرىنىڭ قىزمەتكەرلەرى قۇرامىنان تۇراتىن شەتەلدىك ازاماتتارعا - تەڭىز (وزەن) كەمەلەرىنىڭ قىزمەتكەرلەرى قۇرامىنا قاتىسى مەن مارتەبەسىن دالەلدەيتىن ءتيىستى قۇجاتتارى بولعان جاعدايدا؛

- قازاقستان رەسپۋبليكاسىندا اۋىلشارۋاشىلىق قىزمەتىمەن اينالىساتىن تاۋار يەلەرىنە - اۋىلشارۋاشىلىق قىزمەتىن جۇزەگە اسىرۋدى راستايتىن قۇجاتتار بولعان جاعدايدا (قازاقستان رەسپۋبليكاسى اۋىل شارۋاشىلىعى مينيسترلىگى بەكىتكەن ءتىزىم مەن ۇلگى قۇجاتتارىنا سايكەس)؛

- شەتەلدىك وقۋ ورىندارىندا وقىپ جۇرگەن قازاقستان رەسپۋبليكاسىنىڭ كامەلەت جاسقا تولماعان ازاماتتارىن ەرتىپ جۇرەتىن اتا-انالارىنا (قورعانشىلارى نەمەسە قامقورشىلارىنا)، سونداي-اق ولاردىڭ ستۋدەنتتىك ۆيزالارىن ۇزارتۋ، ستۋدەنتتىك ID- كارتالارىن راسىمدەۋ، ەمتيحان (تەست) تاپسىرۋ ءۇشىن - شەتەلدىك ءبىلىم بەرۋ مەكەمەسىنىڭ شاقىرۋى جانە وسى ماقساتتارمەن شەت ەلگە كىرۋگە رەسمي رۇقساتى بولعان جاعدايدا رۇقسات ەتىلگەن.

ەلدەن شىققان كەزدە قازاقستان رەسپۋبليكاسىنىڭ ازاماتتارى قولدانىستاعى شەكتەۋلەردى جانە ساپار جوسپارلانعان ەلگە كىرۋ مۇمكىندىگىن ءوز بەتىنشە انىقتاۋى قاجەت.