قىرعىزستان كوروناۆيرۋسقا بايلانىستى كۇردەلى ەپيدەميولوگيالىق احۋالعا دايىندالۋدا
بۇل تۋرالى قىرعىزستان پرەمەر-ءمينيسترى كۋباتبەك بورونوۆ بريفينگ بارىسىندا ءمالىم ەتتى، دەپ حابارلايدى قازاقپارات «كابار» اگەنتتىگىنە سىلتەمە جاساپ.
«COVID-19 پاندەمياسىنا بايلانىستى اعىمداعى الەۋمەتتىك- ەكونوميكالىق جانە ەپيدەميولوگيالىق احۋال كۇردەلەنە تۇسۋدە. ازاماتتاردىڭ كوروناۆيرۋس ينفەكتسياسىن جۇقتىرۋ وقيعالارى كۇندەلىكتى تىركەلىپ وتىر. اسىرەسە بىشكەك پەن وش قالالارىندا، شۋ وبلىسىندا جاعداي كۇردەلى. بۇل رەتتە، وڭىرلەردە جاعدايدى باقىلاۋ بويىنشا جۇمىستار قاجەتتى دەڭگەيدە جۇرگىزىلمەي وتىر. قىرعىز رەسپۋبليكاسىنىڭ قاۋىپسىزدىك كەڭەسىنىڭ وتىرىسىندا اتاپ وتىلگەندەي، وبلىستاردىڭ باسشىلارى وزدەرىنە سەنىپ تاپسىرىلعان اۋماقتارداعى ەپيدەميولوگيالىق احۋالعا تىكەلەي جاۋاپتى»، - دەدى كۋباتبەك بورونوۆ.
قىرعىز رەسپۋبليكاسى قاۋىپسىزدىك كەڭەسىنىڭ شەشىمىمەن مەملەكەت اۋماعىندا ءتيىستى ەپيدەميولوگيالىق قاداعالاۋدى قامتاماسىز ەتۋ تاپسىرىلدى.
«شەشىمدە كورسەتىلگەن بارلىق تاپسىرما ساپالى، تولىق كولەمدە جانە ۋاقتىلى ورىندالۋى ءتيىس. ءاربىر مەملەكەتتىك ورگان جانە ءاربىر وبلىس كۇز-قىس كەزەڭىنە كەشەندى دايىندىق شارالارىن ىسكە اسىرۋى قاجەت. بۇل، ناۋقاستار سانىنىڭ ارتۋىنا مەديتسينا مەكەمەلەرىنىڭ دايىن بولۋىنا، سونداي-اق ەكونوميكالىق قىزمەتتىڭ ءتۇرلى باعىتتارىنىڭ جۇمىسىنا بايلانىستى. سونىمەن قاتار COVID-19-بەن سىرقاتتانۋدىڭ ارتۋىنا بايلانىستى ءبىرقاتار شارالار قابىلدانادى»، - دەدى ول.
اقپاراتقا سايكەس، بىشكەك قالاسىندا سەنبى كۇنى تۇستەن كەيىن جانە جەكسەنبىدە كۇنى بويى قوعامدىق كولىك قوزعالىسى توقتايدى. سونداي-اق قوعامدىق كولىكتىڭ وڭىرلەر اراسىندا قاتىناۋىنا تىيىم سالۋ قاراستىرىلۋدا.
بۇل رەتتە، تاكسي، جەكە كولىك جانە جۇك تاسيتىن اۆتوكولىكتەر كەدەرگىسىز قوزعالا بەرمەك. قىرعىزستان ۇكىمەتىنىڭ باسشىسى ءاربىر ازامات ءوزىنىڭ جانە جاقىنىنىڭ دەنساۋلىعى ءۇشىن جاۋاپتى ەكەنىن قاداپ ايتتى.
