ەلباسى وزىنە جازىلعان حاتتار مەن جازبالاردى وقىپ شىعادى - ۇكىباي
بۇل تۋرالى ق ر تۇڭعىش پرەزيدەنتىنىڭ باسپا ءسوز حاتشىسى ايدوس ۇكىباي ايتتى، دەپ حابارلايدى قازاقپارات.
ا. ۇكىباي ەلباسى بارلىق حاتتى وقۋعا ۇلگەرە مە دەگەن سۇراققا جاۋاپ بەرە وتىرىپ: «بارلىق فورماتتا جىبەرىلگەن حاتتار ەلباسىعا كەلىپ تۇسەدى. ارينە، ولشەۋسىز كوپ حات كەلەدى، مۇنداي كولەم بۇرىن دا بولعان. قىزمەتتىك قۇجاتتاردى قاراۋ اراسىنداعى ۇزىلىستە ەلباسى حاتتار مەن تەلەگراممالاردى، الەۋمەتتىك جەلىدە جاريالانعان جازبالاردى مۇقيات وقىپ شىعادى. نۇرسۇلتان نازاربايەۆقا جاستاردىڭ #ElbasymenBirge باستاماسى ۇنادى دەپ ايتا الامىن. قازاقستاننىڭ تۇپكىر- تۇپكىرىنەن، الىس جانە جاقىن شەت ەلدەردەن كەلىپ تۇسكەن قولداۋ سوزدەرى تۇڭعىش پرەزيدەنتكە كۇش-قۋات بەرىپ جاتىر»، - دەدى.
سونىمەن بىرگە، ول ەلباسىنىڭ شەت مەملەكەتتەردە، الپاۋىت ساياساتكەرلەر اراسىندا ۇلكەن بەدەلگە يە ەكەنىن اتاپ ءوتتى.
«ۆلاديمير پۋتين حات ارقىلى دا، تەلەفون ارقىلى دا جىلى لەبىزىن ءبىلدىردى. رەجەپ ەردوعان، ەلباسىنا دەگەن قۇرمەتپەن تىلەگىن قازاق تىلىندە جازعان مايك پومپەو، ورتالىق ازيا ەلدەرىنىڭ باسشىلارى، ءۇندىستاننىڭ پرەمەر-ءمينيسترى نارەندرا مودي جانە وزگە دە مەملەكەت باسشىلارى حابارلاستى. كوپشىلىگى ءۇشىن نۇرسۇلتان نازاربايەۆ جاقسى دوس، جاھاندىق دەڭگەيدەگى ساياساتكەر ۇلگىسى بولىپ قالا بەرەدى. ءوزىم دە بىرنەشە رەت بايقادىم، كوپتەگەن مەملەكەت باسشىلارىمەن كەزدەسۋدە ەلباسى تىلەكتەس، سەنىمدى قارىم-قاتىناس قۇرا الدى. نۇرسۇلتان نازاربايەۆتىڭ بىرەگەي كوپقىرلىلىعى ادامداردى وزىنە تارتاتىن ەرەكشە قاسيەتكە يە. قازىر دە وعان قۇرعاق كەڭسەلىك حات ەمەس، شىنايى الاڭداۋشىلىق پەن قامقورلىققا تولى جولداۋلار كەلۋدە»، - دەدى ايدوس ۇكىباي.
سونىمەن بىرگە، سپيكەر نۇرسۇلتان نازاربايەۆتىڭ اتىنا ەڭبەك سىڭىرگەن ونەر قايراتكەرلەرىنەن، ج و و رەكتورلارىنان، دەپۋتاتتاردان، قوعام قايراتكەرلەرىنەن جانە كوپتەگەن ەڭبەك ۇجىمدارىنان تەلەگراممالار كەلىپ جاتقانىن ايتتى. بۇعان دەيىن باسپا ءسوز حاتشىسى ەلباسىنىڭ دەنساۋلىعى تۋرالى ايتتى. وقشاۋلانۋ تالابىنا بايلانىستى ن. نازاربايەۆ قاشىقتان جۇمىس ىستەپ جاتىر.
ادامداردىڭ بىرلىگى، ولاردىڭ ىزگى جانە شىن كوڭىلدەن بىلدىرگەن تىلەكتەرى تۇڭعىش پرەزيدەنتكە كۇش بەرەتىنىن جەتكىزدى.
ايتا كەتەيىك، ەلباسىنىڭ باسپا ءسوز حاتشىسى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ COVID-19-عا تاپسىرعان سىناماسى وڭ ناتيجە كورسەتكەنىن حابارلاعان ەدى. «اي باستالعالى نۇرسۇلتان نازاربايەۆتىڭ جۇمىس كەستەسى وتە تىعىز بولدى. ەلباسى ەكىجاقتى كەلىسسوزدەر جۇرگىزىپ، رەسمي تۇلعالاردى قابىلدادى. وعان قوسا، تۇڭعىش پرەزيدەنت وتاندىق جانە شەتەلدىك باق وكىلدەرىنە سۇحبات بەردى. جالپى العاندا تەلەۆيزيالىق ءتۇسىرىم ءۇشىن 40 ادام جۇمىس ىستەدى، ونىڭ ىشىندە شەت ەلدىڭ ازاماتتارى دا بار. نۇرسۇلتان نازاربايەۆتىڭ جاعدايىن مەديتسينا قىزمەتكەرلەرى باقىلاپ وتىر. الاڭداۋعا نەگىز جوق. ەلباسى زاماناۋي كوممۋنيكاتسيا ارنالارىن پايدالانىپ قاشىقتان جۇمىس ىستەپ جاتىر»، - دەگەن بولاتىن ول.
