پاندەميادان كەيىن ەڭبەك سالاسى بۇرىنعىداي بولماۋى ءتيىس - ب ۇ ۇ

نۇر-سۇلتان. قازاقپارات - ەڭبەك سالاسىندا كۇردەلى كەمشىلىكتەردى انىقتاعان COVID-19 پاندەمياسى جاپپاي جۇمىسسىزدىققا اكەپ سوقتىرۋى مۇمكىن.

ال بۇل الەۋمەتتىك، ەكونوميكالىق جانە ساياسي كۇيزەلىسكە الىپ كەلەدى.

بۇل تۋرالى ب ۇ ۇ باس حاتشىسى انتونيۋ گۋتەرريش ەسكەرتتى، دەپ حابارلايدى قازاقپارات ب ۇ ۇ جاڭالىقتارى سايتىنا سىلتەمە جاساپ.

«COVID-19 پاندەمياسى ەڭبەك نارىعىن تۇگەل وزگەرتتى. وزگەرىس ءاربىر جۇمىسكەر، ءاربىر كاسىپورىن، جەر شارىنىڭ تۇكپىر-تۇكپىرىنە اسەر ەتكەن. جۇزدەگەن ميلليون ادام جۇمىستان ايىرىلدى»، - دەپ مالىمدەدى ب ۇ ۇ باسشىسى، ۇيىمنىڭ «COVID-19 پەن ەڭبەك نارىعى» اتتى جاڭا زەرتتەۋىن تانىستىرۋ كەزىندە.

انتونيۋ گۋتەرريش داعدارىستىڭ ءبىرىنشى ايىندا ەكونوميكانىڭ بەيرەسمي سەكتورىندا ەڭبەك ەتىپ جۇرگەندەردىڭ تابىسى 60 پايىزعا قىسقارعانىن اتاپ ءوتتى. كوپتەگەن كومپانيالار مەن ولاردىڭ قىزمەتكەرلەرى ەڭبەك جاعدايىنىڭ وزگەرىپ جاتقان جاعدايىنا بەيىمدەلە باستاعان.

مىسالى، ميلليونداعان ادام ونلاين رەجيمدەگى جۇمىسقا اۋىستى. كوپ جاعدايدا قاشىقتان ەڭبەك ەتۋ جەمىسىن بەرە بىلگەن. الايدا بارلىق جۇمىس ونلاين رەجيمدە اتقارىلا المايدى. وعان قوسا، پاندەميا كەزەڭىندە ءبىرقاتار قىزمەت سۇرانىستان شىعىپ قالعان. ەكونوميستەر جابىلۋعا تۋرا كەلگەن شاعىن جانە ورتا كاسىپورىندار ەندى قايتا اشىلمايتىنىنا الاڭداپ وتىر.

سەبەبى، ولار پاندەميا سالدارىنان جۇمىسىن جالعاستىرا المايدى. وسىعان بايلانىستى باس حاتشى ءوزى ۇسىنعان جاڭا زەرتتەۋگە سۇيەنە وتىرىپ، بارلىق مەملەكەتتەرگە قاۋىپتى توپقا كىرەتىن كاسىپورىندار، ولاردىڭ جۇمىسشىلارىنا تەز ارادا قولداۋ كورسەتىپ، جۇمىس ورىندارىن ساقتاپ قالۋعا، جابىلماۋىنا كومەكتەسۋدى ۇسىندى.

«داعدارىستان كەيىن ەڭبەك سالاسى بۇرىنعىداي بولىپ قالماۋى ءتيىس. بارلىق ازاماتتار ءۇشىن لايىقتى جۇمىس ورىندارىن قۇراتىن ۇيلەستىرىلگەن جاھاندىق، وڭىرلىك جانە ۇلتتىق دەڭگەيدە كۇش سالاتىن ۋاقىت كەلدى»، - دەپ اتاپ ءوتتى ب ۇ ۇ حاتشىسى.

ول 2030-جىلعا دەيىنگى كەزەڭگە تۇراقتى دامۋ سالاسىنداعى تاقىرىپتى ەرەكشە نازارعا الىپ، بۇل داعدارىستان مىقتى بولىپ وتۋگە شاقىردى.