حالىقارالىق اۋە جولى قايتا اشىلدى: بۇگىن تۇركيا، دۋبايعا رەيستەر ۇشادى
قازاقستان رەسپۋبليكاسىنىڭ اۋماعىندا كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ 2020-جىلعى 11- ماۋسىمداعى شەشىمىنە جانە ق ر دەنساۋلىق ساقتاۋ مينيسترلىگىنىڭ ۇسىنىمدارىن، ەپيدەميولوگيالىق جاعدايدىڭ دەڭگەيىن ەسكەرە وتىرىپ، دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) كارتاسىنا سايكەس 2020-جىلعى 20- ماۋسىمنان باستاپ تۇركياعا، قىتايعا، وڭتۇستىك كورەياعا، تايلاندقا، گرۋزيا مەن جاپونياعا حالىقارالىق رەيستەر كەزەڭ-كەزەڭمەن جاڭارتىلادى.
حالىقارالىق باعىتتار بويىنشا رەيستەر سانى اۋە قاتىناسى تۋرالى قولدانىستاعى ۇكىمەتارالىق كەلىسىمدەر نەگىزىندە جانە ءار باعىت بويىنشا اۋە كەمەلەرىنىڭ كوممەرتسيالىق جۇكتەمەسىنە بايلانىستى ورىندالاتىن بولادى.
رەيستەر مەن بيلەتتەردى ساتۋ اۋەكومپانيالاردىڭ سايتتارىندا جاريالانعان كەستەگە سايكەس جۇزەگە اسىرىلادى.
وسى ورايدا ازاماتتاردىڭ جوعارىدا اتالعان ەلدەرمەن مەملەكەتتىك شەكارالار ارقىلى وتۋىنە شەكتەۋلەردى الىپ تاستاۋ ەسكەرىلگەن. بەلگىلەنگەن كەستەگە سايكەس، بۇگىن الماتى حالىقارالىق اۋەجايىنان ىستانبۇلعا، انتالياعا جانە دۋبايعا رەيس ۇشىرىلادى.
ەلوردالىق ن. نازاربايەۆ اۋەجايىندا نۇر-سۇلتان-ىستانبۇل رەيسى جوسپارلانعان. سونىمەن بىرگە، بۇگىن اتىراۋ قالاسىنان دا ىستانبۇلعا ءبىر رەيس ۇشادى.
