تەڭىز كەنىشىندە ۆاحتالىق جۇمىس مەرزىمى ۇزارادى

اتىراۋ. قازاقپارات - اتىراۋ وبلىسىنداعى تەڭىز كەنىشىندە ۆاحتالىق جۇمىس مەرزىمى ەكى ەسە ۇزارتىلادى، دەپ حابارلايدى قازاقپارات.

«تەڭىزشيەۆرويل» ج ش س ۇكىمەتپەن جانە جۇرتشىلىقپەن بايلانىس ءبولىمىنىڭ باس مەنەدجەرى رزابەك ارتىعاليەۆتىڭ مالىمەتىنشە، 15- ماۋسىم كۇنى تەڭىز كەنىشىندە جۇمىسشىلاردىڭ ۆاحتالىق اۋىسۋى باستالعان.

«ەندى بۇرىن 14 كۇن جۇمىس ىستەگەندەر 28 كۇنگە اۋىستىرىلادى. ال، 28 كۇندىك ۆاحتاعا كەلگەندەر ەندى 56 كۇن جۇمىس ىستەيدى. ۆاحتالىق جۇمىس مەرزىمىنىڭ ۇزارتىلۋى قازاقستاننىڭ ەڭبەك زاڭدىلىعىنا سايكەس جۇمىسشىلاردىڭ كەلىسىمىمەن جۇرگىزىلەدى»، - دەدى رزابەك ارتىعاليەۆ.

ونىڭ ايتۋىنشا، تەڭىز كەن ورنىندا 13700 ادام جۇمىس ىستەپ جاتىر. ت ش و قىزمەتكەرلەرىنىڭ اراسىنان - 73، ال مەردىگەر مەكەمەلەردەن - 1194 ادام قاۋىپتى ىندەتتى جۇقتىرعان. سونداي-اق، كوروناۆيرۋس ينفەكتسياسىنان 806 ادام جازىلعان. قازىر تەڭىز كەنىشىندەگى ينفەكتسيالىق ستاتسيوناردا 208 ادام جاتىر.

ەسكە سالا كەتەلىك، بۇعان دەيىن اتىراۋدا كارانتين شەكتەۋى قايتا كۇشەيتىلدى.