قازاقستاندا جەمقورلىق فاكتىلەرى كوبەيىپ بارادى - اگەنتتىك
«2017-2019 -جىلدارى جانە 2020 -جىلدىڭ العاشقى بەس ايىندا سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى پارا بەرۋگە قاتىستى مىڭعا تارتا قىلمىستى تىركەدى. سونىمەن بىرگە كەيىنگى ءۇش جىلداعى ديناميكا پارا بەرۋشىلەرگە قاتىستى فاكتىلەردىڭ وسكەنىن كورسەتىپ وتىر. ماسەلەن بۇل باعىتتا 2017 -جىلى 255، 2018 -جىلى 232، 2019 -جىلى 342 قىلمىس انىقتالسا، ال 2020 -جىلدىڭ العاشقى بەس ايىندا 172 قىلمىس تىركەلگەن. ەندى ستاتيستيكانى سالىستىرا بەرىڭىز: 2018 -جىلى پارا بەرۋشىلەرگە قاتىستى 232 قىلمىس تىركەلسە، ءبىر جىلدان كەيىن بۇل قىلمىس سانى 342-گە دەيىن ارتقان»، - دەدى دانيار بەكايداروۆ اگەنتتىكتىڭ بۇگىنگى «انتيكور LIVE « ايدارىندا.
وسى ارالىقتا قازاقستاندا پارا بەرگەنى ءۇشىن 586 ادام سوتتالىپتى. ولاردىڭ 154 ى باس بوستاندىعىنان ايىرىلسا، 377 ى ايىپپۇل ارقالاعان. تاعى 67 ادامنىڭ باس بوستاندىعى شەكتەلگەن. «بيىل پارا ءۇشىن قىلمىستىق جاۋاپكەرشىلىككە تارتىلعان ازاماتتاردىڭ بەستەن ءبىرى، ياعني 20 پايىزى مەملەكەتتىك قىزمەتكەرلەردىڭ ءوزى. ولار سوتتالۋدان بولەك مەملەكەتتىك قىزمەتتەن بوساتىلعان جانە مەملەكەتتىك قىزمەتتە ءومىر بويى جۇمىس ىستەۋ قۇقىعىنان ايرىلعان ازاماتتار. تالداۋ جۇمىستارى كورسەتىپ وتىرعانداي پارا بەرۋشىلەردىڭ كوبى - جەكە كومپانيالاردىڭ وكىلدەرى. ولار لاۋازىمدى ادامداردى ساتىپ الۋ ارقىلى ءوز كاسىبىن جۇرگىزگىسى كەلەدى، مەملەكەتتىك ساتىپ الۋ بويىنشا اتقارىلعان جۇمىسقا قول قويۋ ءۇشىن وسىنداي ىسكە بارادى»، - دەدى ول.
دانيار بەكايداروۆ ءسوزىن ناقتى مىسالدارمەن شەگەلەي ءتۇستى. ونىڭ ايتۋىنشا، الماتىدا ج ش س وكىلدەرىنىڭ بىرىنە قاتىستى قىلمىستىق ءىس قوزعالعان. ول كەلىسىمگە سايكەس سومانىڭ بەس پايىزىن (33 ميلليون تەڭگە) قاراساي اۋدانى اكىمىنىڭ ورىنباسارىنا بەرگەن. اقشانى جالپى قامقورلىق ءۇشىن ۇسىنعان.
«وسىعان ۇقساس قىلمىس بويىنشا ەلوردادا «اقجايىق ەلەكترو» ج ش س ديرەكتورى جازالانىپ، وعان 71040000 تەڭگە ايىپپۇل سالىندى. ول الماتى اۋدانى اكىمىنىڭ بۇرىنعى ورىنباسارىنا (3 جىلعا باس بوستاندىعىنان ايىرىلعان) جالپى قامقورلىعى مەن ورىندالعان جۇمىس بويىنشا جۇمىس اكتىسىنە قول قويىپ بەرۋى ءۇشىن 5 ميلليون تەڭگە پارا بەرگەن»، - دەيدى دانيار بەكايداروۆ.
اۆتور: ايان بەكەن ۇلى
