الەمدەگى جاعداي: اۋستراليا، ءۇندىستان، پاكىستاندا كوروناۆيرۋس ورشۋدە

لوندون. قازاقپارات - اۋستراليا، ءۇندىستان، پاكىستان مەن باسقا دا ەلدەردە كوروناۆيرۋس ينفەكتسيا ورشۋدە.

بۇل تۋرالى قازاقپارات bbc.com سىلتەمە جاساپ حابارلايدى.

دجونس حوپكينس ۋنيۆەرسيتەتىنىڭ مالىمەتى بويىنشا الەمدە كوروناۆيرۋس جۇقتىرعاندار سانى 8,4 ميلليون ادامدى قۇرادى.

450 مىڭنان استام ناۋقاس قايتىس بولدى

قازىرگى ۋاقىتتا لاتىن امەريكسى ينفەكتسيا تارالۋ وشاعىنا اينالدى. ءبىرقاتار ەلدە ىندەتتىڭ ەكىنشى تولقىنىنىڭ بەلگىلەرى بايقالادى.

ەۋروپا ەلدەرىندەگى جاعداي Google مەن Apple ناۋقاستارمەن بايلانىستى باقىلاۋعا كومەكتەسەدى.

بريتاندىق ۇكىمەت بەيسەنبى كۇنى Covid-19-دى جۇقتىرعاندارمەن بايلانىستى قاداعالاۋعا ارنالعان ءوز قوسىمشاسىنان باس تارتتى جانە ونىڭ ورنىنا ۇيالى تەلەفوندار نارىعىندا ۇستەمدىك ەتەتىن امەريكالىق Apple جانە Google كومپانيالارىمەن بىرگە جۇمىس ىستەيتىن بولادى.

ۇلىبريتانيا - ەۋروپاداعى كوروناۆيرۋستان ەڭ كوپ زارداپ شەككەن ەل.

دجونس حوپكينس ۋنيۆەرسيتەتىنىڭ مالىمەتتەرى بويىنشا، 300 مىڭنان استام ادام اۋرۋعا شالدىققا (الەمدە بەسىنشى ورىن) جانە 42,3 مىڭ ادام قايتىس بولدى (الەمدە ءۇشىنشى ورىن).

ەۋروپاداعى جاعداي

گەرمانيادا ەلدىڭ سولتۇستىك-باتىسىنداعى گيۋتەرسلوحتاعى قاساپحانادا كوروناۆيرۋس اۋرۋى باستالعاننان كەيىن مىڭداعان ادام كارانتينگە جابىلدى.

مىڭنان استام ادام Covid-19 تەستىلەۋىنەن ءوتتى. 650 ادامنان كوروناۆيرۋس انىقتالدى.

تەستىلەۋدەن ءوتۋ ءۇشىن بىرنەشە مىڭ ادام كەزەكتە تۇر.

رەسەي

رەسەي دەنساۋلىق ساقتاۋدى باقىلاۋ مالىمەتى بويىنشا ەلدە كوروناۆيرۋستان جۇمىس كەزىندە ۆيرۋس جۇقتىرعان 489 دارىگەر قايتىس بولعان. بۇل مامىر ايىنداعى ستاتيستيكامەن سالىستىرعاندا وتە كوپ، ول كەزدە Covid-19-دان 101 مەديتسينا قىزمەتكەرى قايتىس بولعان.

رەسەي اۋرۋ جۇقتىرعاندار سانى بويىنشا الەمدە ءۇشىنشى ورىندا، سوڭعى تاۋلىكتە انىقتالعان 7790 وقيعانى قوسا العاندا 561 مىڭ ادام ينفەكتسيا جۇقتىرعان.

باسقا ەلدەردەگى احۋال

پاكىستاندا پەندجاب پروۆينتسياسىنىڭ ءبىرقاتار قالاسىندا ءىشىنارا كارانتين ەنگىزىلدى.

پروۆينتسياداعى حالىق سانى 100 ميلليون ادامنان اسادى. سوڭعى اپتادا كەيبىر اۋدانداردا، اتاپ ايتقاندا، لاحور اكىمشىلىك ورتالىعىندا كوروناۆيرۋسپەن اۋىرعاندار سانى كۇرت ءوستى.

پەندجابتىڭ وزىندە بارلىعى شامامەن 60 مىڭ كوروناۆيرۋس جۇقتىرۋ جاعدايلارى تىركەلگەن.

پوليتسيا لوكداۋن ەنگىزىلگەن اۋماقتاردىڭ شەكاراسىن كۇزەتەدى.

تەك ازىق-تۇلىك دۇكەندەرى مەن ءدارىحانالار اشىق. قوعامدىق كولىك جۇمىس ىستەمەيدى، سونداي-اق جەكە اۆتوكولىكپەن جۇرۋگە تىيىم سالىنعان.

پاكىستان بيلىگىنىڭ شەشىمى بويىنشا جاڭا جاعدايلاردىڭ سانى 300 گە جەتەتىن جەرلەردە كارانتين ەنگىزىلەدى.

ءۇندىستاندا اۋىرعانداردىڭ رەكوردتىق تاۋلىكتىك كورسەتكىشى تىركەلدى، 12881 ادام ۆيرۋس جۇقتىرعان.

دەليدە ينفەكتسيا دەنساۋلىق ساقتاۋ مينيسترىنەن انىقتالدى، بۇعان دەيىن ول تىنىس الۋ قيىنداپ، دەنە قىزۋى كوتەرىلگەنىنە شاعىمدانىپ، دارىگەرگە جۇگىنگەن بولاتىن.

مۋمبايدا مىڭداعان ادام اۋىرىپ قالدى. الايدا، وسىعان قاراماستان، ءۇندىستان ەكونوميكالىق سەبەپتەر ءۇشىن كارانتيندى السىرەتىپ وتىر.

الەمدە سىرقاتتانعاندار سانى بويىنشا ءۇندىستان ءتورتىنشى ورىندا. ەلدە 367 مىڭعا جۋىق ادام اۋىرسا، 12 مىڭنان استام ناۋقاس قايتىس بولدى.

قىتاي Covid-19- ^دىڭ 28 جاڭا جاعدايى تۋرالى حابارلادى. ونىڭ 21 ءى بەيجىڭدە تىركەلگەن.

وتكەن اپتادا ەل استاناسىندا اۋرۋ ءورشىپ، قالانىڭ ءىرى ازىق-تۇلىك بازارى اۋرۋ وشاعىنا اينالدى. بۇعان دەيىن 57 كۇن بويى قالادا اۋرۋدىڭ بىردە-ءبىر جاڭا جاعدايى تىركەلمەگەن ەدى.

قازىر بەيجىڭنىڭ 30 عا جۋىق اۋدانى كارانتينگە جابىلدى.

اۆستراليادا دا جاڭا جاعدايلار انىقتالدى. حالىق سانى جونىنەن ەكىنشى ورىندا تۇرعان اۋستارليانىڭ ۆيكتوريا شتاتىندا ەكى كۇندە 18 ادام اۋىرعان.

دارىگەرلەردىڭ ايتۋىنشا، ينفەكتسيا بىرنەشە كۇن بۇرىن جاڭا زەلاندياداعىداي شەتەلدىك تۋريستەردەن ەمەس، جەرگىلىكتى حالىقتان انىقتالعان.

لاتىن امەريكاسى - Covid-19 وشاعى

دجونس حوپكينس ۋنيۆەرسيتەتىنىڭ مالىمەتى بويىنشا پەرۋدە ۆيرۋس جۇقتىرعاندار سانى 241 مىڭعا جەتتى.

پەرۋ - كوروناۆيرۋستان ەڭ كوپ زارداپ شەككەن لاتىن امەريكاسىنداعى برازيليادان كەيىنگى ەكىنشى ەل.