تۇرىك ديپلوماتى ب ۇ ۇ باس اسسامبلەياسىنىڭ ءتوراعاسى بولىپ سايلاندى
ب ۇ ۇ باس اسسامبلەياسىنىڭ زالىندا اسسامبلەيانىڭ 75- سەسسياسىنىڭ ءتوراعاسى سايلاندى. سايلاۋ ەرەكشە فورماتتا ءوتتى. ءار ەلدىڭ دەلەگاتى ماسكا كيىپ، ءبىر-بىرەۋدەن ىشىندە ەشكىم جوق بوس زالعا كەلىپ داۋىس بەردى.
سوسىن ولار تەز ارادا ب ۇ ۇ شتاب-پاتەرىنەن كەتىپ قالدى. داۋىس بەرۋ ناتيجەسى بويىنشا تۇرىك ديپلوماتى، ساياسي قايراتكەر ۆولكان بوزكىر ب ۇ ۇ باس اسسامبلەياسىنىڭ 75- سەسسياسىنىڭ ءتوراعاسى بولىپ سايلاندى.
ايتا كەتەيىك، باس اسسامبلەيا ءتوراعاسى بەس ايماقتىق توپ اراسىنداعى روتاتسيا قاعيداسىن ساقتاي وتىرىپ سايلانادى. 75- سەسسيا ءتوراعاسى باتىس ەۋروپا مەن سول ماڭايداعى باسقا دا ەلدەر اراسىنان شىعۋعا ءتيىس بولاتىن. ول ەلدەردىڭ قاتارىنا تۇركيا دا كىرەدى.
اتالعان ايماقتىق توپ تۇركيالىق ديپلوماتتىڭ كانديداتۋراسىن ءبىراۋىزدان ماقۇلداپ ۇسىنعان. ودان باسقا ەشقانداي ۇمىتكەر بولماعاندا داۋىس بەرۋدىڭ قاجەتى بولماس ەدى.
الايدا بىرنەشە ەل سايلاۋ وتكىزۋدى ءوتىندى. ناتيجەسىندە 178 ەلدىڭ وكىلى ۆولكان بوزكىردى جاقتاپ داۋىس بەرگەن.
ەسكە سالا كەتەيىك، ءبىز بۇعان دەيىن ب ۇ ۇ باس اسسامبلەياسى قاۋىپسىزدىك كەڭەسىنىڭ تۇراقتى ەمەس بەس جاڭا مۇشەسى سايلانعانىن حابارلاعان بولاتىنبىز.
