كوروناۆيرۋستى بىرگە جەڭەمىز - الماتىنىڭ ارداگەرلەرى ەلباسىنىڭ تەزىرەك ساۋىعىپ كەتۋىن تىلەدى

نۇر-سۇلتان. قازاقپارات - الماتىلىق نەسىپحان باتىرحانوۆا ەسىمدى زەينەتكەر الماتى قالاسىنىڭ الاتاۋ اۋدانىنىڭ ارداگەرلەر كەڭەسى اتىنان ەلباسى نۇرسۇلتان نازاربايەۆقا تەزىرەك ساۋىعىپ كەتۋىن تىلەپ، وڭتۇستىك استانا حالقىنىڭ ىقىلاسىن جولدادى، دەپ حابارلايدى قازاقپارات ءتىلشىسى.

«قۇرمەتتى ەلباسى! نۇرسۇلتان ءابىش ۇلى! جاڭالىقتاردان ءسىزدىڭ اتى جامان اۋرۋعا دۋشار بولىپ قالعانىڭىزدى ەستىپ جاتىرمىز. مەن 75 جاسقا تولدىم. جەڭىسپەن جاستىمىن. ءسىز كورگەن قيىندىقتاردى مەن دە كوردىم. ءبىراق ءسىزدىڭ اقىلىڭىز بەن كۇش-جىگەرىڭىز ءبىزدىڭ قازاق ەلىمىز جاقسى زاماندا ءومىر ءسۇرىپ جاتىر. ەلگە قانداي ەڭبەگىڭىزدى سىڭگەنى بىزگە عانا ءمالىم ەمەس، بۇكىل دۇنيە ءجۇزى بىلەدى. كوروناۆيرۋستى دا، كارانتيندى دە ءسىز بولىپ، ءبىز بولىپ جەڭەمىز. الاتاۋ اۋدانىنىڭ ارداگەرلەرى تۇگەل جينالىپ كەلەيىك دەپ ەدىك. الايدا كارانتين بولعاننان كەيىن تىلەۋىڭىزدى ۇيدە تىلەپ وتىرمىز. سول ارداگەرلەردىڭ اتىنان سىزگە تەزىرەك جازىلىپ كەتۋدى تىلەيمىز. تەزىرەك قاتارىمىزعا قوسىلۋىڭىزدى شىن جۇرەكتەن تىلەيمىز»، - دەيدى نەسىپحان باتىرحانوۆا.

ايتا كەتسەك، ەلباسىنىڭ باسپا ءسوز حاتشىسى ايدوس ۇكىباي قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ Covid-19-عا تاپسىرعان سىناماسى وڭ ناتيجە كورسەتكەنىن حابارلاعان ەدى.

سوعان قاراماستان نۇرسۇلتان ءابىش ۇلى ءوزىن-ءوزى وقشاۋلاپ، قاشىقتان جۇمىس ىستەۋدى جالعاستىرۋدا.