ماۋلەن اشىمبايەۆ: ۇكىمەت ۇلتتىق قوردى پايدالانۋدى ازايتۋ شارالارىن قاراستىرۋى قاجەت

نۇر- سۇلتان. قازاقپارات - پارلامەنت سەناتىنىڭ ءتوراعاسى ماۋلەن اشىمبايەۆ دەپۋتاتتاردىڭ بيۋدجەت كىرىسىنىڭ شامامەن ۇشتەن ءبىرىنىڭ ۇلتتىق قوردان جاساقتالعانىنا الاڭداۋشىلىق ءبىلدىرىپ وتىرعانىن مالىمدەدى، دەپ حابارلايدى قازاقپارات ءتىلشىسى.

«ۇكىمەت، ۇلتتىق بانك جانە ەسەپ كوميتەتىنىڭ ەسەپتەرىن زەردەلەي كەلىپ، 2019 -جىلعى رەسپۋبليكالىق بيۋدجەتتىڭ نەگىزگى پارامەترلەرى ورىندالدى دەگەن قورىتىندى جاساۋعا بولادى. بۇگىنگى كۇنى رەسپۋبليكالىق بيۋدجەت ەلىمىزدەگى ەكونوميكالىق بەلسەندىلىكتى قولداۋدىڭ نەگىزگى تەتىگى بولىپ وتىر. جالپى ۇكىمەت مەملەكەتتىك باعدارلامالاردىڭ ورىندالۋىن ايتارلىقتاي دەڭگەيدە قامتاماسىز ەتتى. سونىڭ ارقاسىندا كوزدەلگەن ماقساتتاردىڭ نەگىزگى كورسەتكىشتەرىنە قول جەتكىزىلدى. ەسەپ كوميتەتىنىڭ دە بەلسەندى جۇمىسىن اتاپ وتكىم كەلەدى»، - دەدى ماۋلەن اشىمبايەۆ پارلامەنت سەناتىنىڭ وتىرىسىندا.

سەنات سپيكەرى ءوز سوزىندە اتقارىلعان جۇمىستارعا قاراماستان ولقىلىقتار دا جوق ەمەستىگىن اتاپ ءوتتى.

«مىسالى ءتيىمسىز جۇمسالعان بيۋدجەت قاراجاتىنىڭ كولەمى ءۇش ەسە ارتقان. ەسەپ كوميتەتى وتكەن جىلدارى وزگە دە زاڭبۇزۋشىلىقتارعا جول بەرىلگەنىن انىقتاپ وتىر. يگەرىلمەگەن قارجى كولەمى دە ايتارلىقتاي وسكەن. سونداي- اق بۇگىن دە ۇلتتىق قوردى ۇيلەسىمدى باسقارۋ، اسىرەسە ونىڭ ساقتالۋىن جانە تابىستىلىعىن ءتيىستى دەڭگەيگە جەتكىزۋ ماسەلەسى وزەكتى بولىپ وتىر. ۇلتتىق قور قاراجاتىن پايدالانۋ جاعدايلارى ارتىپ، بيۋدجەت كىرىسىنىڭ شامامەن ۇشتەن ءبىرى وسى قوردان جاساقتالعانى ءمالىم. بۇل جاعدايعا دەپۋتاتتار الاڭداۋشىلىقپەن قاراپ وتىر. ۇلتتىق قوردى پايدالانۋدى ازايتۋ ءۇشىن ۇكىمەت بيۋدجەت كىرىسىنە باسا ءمان بەرە وتىرىپ، شىعىنداردىڭ تيىمدىلىگىن قامتاماسىز ەتۋى قاجەت»، - دەدى ول.

ماۋلەن اشىمبايەۆ ءوز سوزىندە بۇل رەتتە وڭىرلەرگە باسا ءمان بەرگەن ءجون ەكەنىن جەتكىزدى.

«دەپۋتاتتاردىڭ پايىمداۋىنشا قولدانىستاعى بيۋدجەت جۇيەسى ارتىعىمەن ورتالىقتاندىرىلعان. ءالى كۇنگە دەيىن رەسپۋبليكالىق بيۋدجەتتەن بولىنەتىن قاراجات وڭىرلەردەگى الەۋمەتتىك- ەكونوميكالىق ماسەلەلەردى شەشۋدىڭ باستى قارجى كوزى بولىپ وتىر. مۇنداي بيۋدجەتارالىق قاتىناس جەرگىلىكتى بيلىكتىڭ ءوڭىر ەكونوميكاسىن دامىتۋعا جانە كىرىس بازاسىن كەڭەيتۋگە دەگەن موتيۆاتسياسىن تومەندەتەدى دەپ ويلايمىز. سونداي- اق وڭىرلەردەگى دامۋعا بولىنەتىن قاراجات تا كەيبىر جاعدايدا ءتيىمسىز جۇمسالۋدا. سوندىقتان بارلىق دەڭگەيدەگى بيۋدجەت پروتسەسىن ۇيىمداستىرۋ جۇمىسىن جەتىلدىرگەن ابزال. وسىعان وراي ايماقتار دەڭگەيىندە اشىق بيۋدجەتتى ەنگىزۋ ماسەلەسىن قولعا العان دۇرىس بولادى. سول ارقىلى ازاماتتار قارجىنىڭ قايدا جۇمسالىپ جاتقانىن كورىپ، ءوز ۇسىنىستارىن بەرىپ، قاراجاتتىڭ جۇمسالۋىنىڭ تيىمدىلىگىن باعالاۋعا مۇمكىندىك الادى. مۇنداي تاجىريبەنى بارلىق بيۋدجەتتىك مەكەمەگە ەنگىزگەن ءجون»، - دەدى ماۋلەن اشىمبايەۆ.

اۆتور: ايان بەكەن ۇلى