قازاقستاندىقتار ازىق-تۇلىككە كوپ اقشا جۇمساي باستادى - ەسەپ كوميتەتى
«بۇگىن ءبىز وتكەن جىلعى بيۋدجەتتىڭ ورىندالۋى تۋرالى ەسەپتى تىڭداپ جاتىرمىز. ءبىراق وسى جارتى جىلدىڭ ىشىندە نە وزگەردى؟ ءبىر جاعىنان، وتكەن جىلى ەكونوميكانىڭ كوپتەن كۇتكەن ءوسىمى بولعانىن ايتامىز. ەكىنشى جاعىنان، وسى جارتى جىلدىڭ ىشىندە وتە كۇردەلى جاعدايلار ءوتىپ جاتىر. بىزدە دە، الەمدە دە سول. سول سەبەپتى، قازىر مەن زاڭبۇزۋشىلىقتاردى تالقىلاماس بۇرىن جۇيەلى ماسەلەلەرگە توقتايىن»، - دەدى ناتاليا گودۋنوۆا پارلامەنت سەناتىندا 2019-جىلعى رەسپۋبليكالىق بيۋجەتتىڭ اتقارىلۋى تۋرالى ەسەپتى بايانداۋ كەزىندە. ەسەپ كوميتەتىنىڭ باسشىسى پرەزيدەنت مەملەكەتتىك باعدارلامالاردىڭ جۇزەگە اسىرىلۋى مەن بيۋدجەت قاراجاتىن پايدالانۋعا قاتىستى جاۋاپكەرشىلىك پەن ەسەپتىلىكتى قاتاڭداتۋ كەرەكتىگىن تاپسىرعانىن ەسكە سالدى.
«دەپۋتاتتاردىڭ ارقاسىندا مۇنداي جاۋاپكەرشىلىك بيۋجەت كودەكسى مەن اكىمشىلىك قۇقىقبۇزۋشىلىق جونىندەگى كودەكسكە ەنگىزىلدى. ال 2019-جىلدىڭ رەسپۋبليكالىق بيۋجەتى قانداي ناتيجەمەن يگەرىلدى؟ بىرىنشىدەن قازاقستاننىڭ دۇنيەجۇزىلىك ەكونوميكالىق فورۋمىنداعى جاھاندىق باسەكەگە قابىلەتتىلىك رەيتينگىندەگى ماكروەكونوميكالىق تۇراقتىلىعى 60-ورىنعا دەيىن كوتەرىلىپ، پوزيتسياسىن جاقسارتا ءتۇستى. ايتسە دە، مۇنايعا تاۋەلدىلىكتى تومەندەتۋ تەندەنتسياسىنا قول جەتكىزىلگەن جوق. كەيىنگى ون جىلدىڭ ىشىندە وڭدەۋ سەكتورىنىڭ ۇلەسى 11 پايىزدان اسپاي تۇر. ەكسپورت قۇرىلىمىندا مينەرالدى ونىمدەردىڭ ۇلەسى 70 پايىزدان اسىپ كەتتى»، - دەدى ول.
ناتاليا گودۋنوۆا ازاماتتاردىڭ ءال- اۋقاتىن جاقسارتۋ ماسەلەسىنە دە توقتالدى.
«حالىقتىڭ شىنايى تابىسى 5,5 پايىزعا ءوستى. الايدا، ازىق-تۇلىك تاۋارلارىنا حالىقتىڭ شىعاراتىن شىعىنى 50 پايىزعا دەيىن جەتتى. دامىعان ەلدەردە بۇل كورسەتكىش 10 پايىز كولەمىندە. ءتىپتى رەسە يمەن بەلارۋستە بۇل كورسەتكىش شىعىننىڭ ۇشتەن بىرىنە (28 پايىز جانە 32 پايىز) تەڭ. بۇل نەنى بىلدىرەدى؟ حالىق تابىسىنىڭ جارتىسى «جەلىنىپ»، تۇرعىنداردا ءوز جيناعىنىڭ كولەمىن ارتتىرۋعا مۇمكىندىك جوق دەگەن ءسوز»، - دەدى ول.
