اتىراۋدا كارانتيندىك شەكتەۋ قايتا كۇشەيتىلدى

اتىراۋ. قازاقپارات - اتىراۋ وبلىسىنىڭ باس مەملەكەتتىك سانيتارلىق دارىگەرىنىڭ قاۋلىسىمەن كارانتيندىك شەكتەۋ شارالارى قايتا كۇشەيتىلدى، دەپ حابارلايدى قازاقپارات.

«اتىراۋ قالاسى مەن اتىراۋ وبلىسى اۋماعىندا كارانتيندىك شەكتەۋ شارالارىنىڭ قولدانىلۋى ەپيدەميولوگيالىق جاعداي تولىقتاي تۇراقتانعانعا دەيىن سوزىلسىن»، - دەلىنگەن اتىراۋ وبلىسىنىڭ باس مەملەكەتتىك سانيتارلىق دارىگەرى امانتاي جۇماعاليەۆتىڭ قاۋلىسىندا.

قاۋلىعا سايكەس، تۇرعىندار مەن جەكە كولىكتەردىڭ تۇنگى ساعات 23:00 دەن تاڭعى 06:00 گە جۇرۋىنە، سونداي-اق، ويىن-ساۋىق، سپورتتىق جانە باسقا دا بۇقارالىق ءىس-شارالاردى، وتباسىلىق، ەسكە الۋ شارالارىن (بانكەتتەر، ۇيلەنۋ تويلارى، مەرەيتويلار، اس بەرۋلەر)، سونىڭ ىشىندە ۇيدە جانە ادامدار كوپ جينالاتىن وزگە دە ءىس-شارالاردى وتكىزۋگە، قوعامدىق ورىندارعا، ونىڭ ىشىندە الاڭدارعا، ساياباقتارعا، جاعالاۋلارعا بارۋعا، مەنشىك نىسانىنا قاراماستان بارلىق مەكتەپكە دەيىنگى بالالار ۇيىمدارىنىڭ قىزمەتىنە تىيىم سالىنعان.

قالا سىرتىنداعى ساۋىقتىرۋ ورتالىقتارىنىڭ جانە مەكتەپ جانىنداعى لاگەرلەردىڭ، كينوتەاترلاردىڭ، تەاترلاردىڭ، كورمەلەردىڭ، ينتەرنەت پەن كومپيۋتەرلىك ويىن كلۋبتارىنىڭ جانە ادامدار كوپ شوعىرلاناتىن باسقا دا نىسانداردىڭ قىزمەتى توقتاتىلعان. سونداي-اق، ءدىني نىساندار قىزمەتىنە جانە حالىقتىڭ وندا بارۋىنا تىيىم سالىنىپ وتىر.

بۇعان دەيىن اتىراۋدا ۇلتتىق ساراپتاما ورتالىعىنىڭ ديرەكتورى مەن 13 قىزمەتكەرى كوروناۆيرۋس جۇقتىرعان بولاتىن.