ينفەكسيونيست دارىگەر: يتاليا مەن ا ق ش- تاعى جاعدايدان ساباق الۋ كەرەك

نۇر- سۇلتان. قازاقپارات - قازاقستاننىڭ جەتەكشى ينفەكسيونيست دارىگەرى، مەديتسينا عىلىمدارىنىڭ دوكتورى ديناگۇل باەشيەۆا كۆي قاۋپىنەن ساقتانۋ ءۇشىن سىرتقا سەبەپسىز شىقپاۋدى تاعى دا حالىقتىڭ ەسىنە سالدى، دەپ حابارلايدى قازاقپارات ءتىلشىسى.

«كوروناۆيرۋسقا ءبارىبىر - ءبىرىنشى تولقىن با، جيىرماسىنشى تولقىن با - ايىرما جوق. ۆيرۋسقا جاز با، كۇز بە، قازاقسىڭ با، گۇرجىسىڭ بە - ءبارىبىر. ول ەڭ الدىمەن ءوزىنىڭ كوبەيۋ جولىن ىزدەيدى. مىندەتى - وكپەگە جەتسە بولدى. قازىر كوروناۆيرۋس جرۆي نەمەسە پنيەۆمونيا ارقىلى بەلگىلى بولىپ وتىرعان جوق. سول سەبەپتى ءبىز سوزىلمالى اۋرۋلارى بار ادامدارعا ماڭىز بەرىپ كەلەمىز. كوروناۆيرۋس جۇقتىرعان ادامنىڭ بۇرىننان بەرگى سوزىلمالى اۋرۋى قوزىپ كەتۋى ىقتيمال»، - دەدى ديناگۇل باەشيەۆا دەنساۋلىق ساقتاۋ مينيسترلىگىنىڭ Facebook پاراقشاسىنداعى «مينيسترلىك حابارلايدى» ايدارىندا.

ينفەكسيونيست دارىگەردىڭ ايتۋىنشا، وسىعان دەيىن قازاقستان قاتاڭ شەكتەۋ شارالارىن ەنگىزگەنىمەن ەكونوميكاداعى تۋىنداعان قيىندىقتارعا بايلانىستى شەكتەۋ شارالارىن الۋعا ءماجبۇر بولعان.

«ءبىراق ءۇش ايدىڭ ىشىندە ادامدار كوروناۆيرۋسقا قارسى كۇرەستى ۇيرەنىپ الاتىنداي ۋاقىت بولدى. سەبەبى قۇرىپ كەتكەن جوق. ارامىزدا ءجۇر. قاۋپىن سەزىنە ءجۇرۋىمىز كەرەك. ماسەلەن، وڭتۇستىك كورەيادا ءبىر موناشكا عانا 300 ادامدى جۇقتىرعان. ياعني مۇنداي وشاقتار كەز كەلگەن ۋاقىتتا تۋىنداۋى مۇمكىن. سوندىقتان ءبىزدىڭ مىندەت - جاعدايعا قاراي بەيىمدەلۋ. قاجەتتىلىك تۋىنداماعان جاعدايدا سىرتقا شىقپاعان ابزال»، - دەدى ول.

ديناگۇل باەشيەۆا يتاليا مەن ا ق ش- تاعى جاعدايدى ۇمىتپاۋعا شاقىردى. «ول جاقتاعى ادامدار جينالىپ الىپ، ۆيرۋستى كوزگە ىلگىسى كەلمەگەندىكتەن، احۋال قيىنداپ كەتتى. ال سينگاپۋر، تايلاند ەلدەرى اقىرىن ءجۇرىپ، انىق باسىپ كەلەدى. سوندا عانا تۋعان- تۋىستارىمىزدى، دوستارىمىزدى قاۋىپتەن ساقتاي الامىز»، - دەدى ول.

اۆتور: ايان بەكەن ۇلى