سيمپتومى جوق ناۋقاستان دا اۋرۋ جۇعادى - ينفەكسيونيست دارىگەر
«13 - ناۋرىزدان بەرى اۋرۋحاناعا تۇسكەن ناۋقاستاردىڭ 39 پايىزىندا سيمپتوم بولماعان. ال 36,7 پايىزىندا COVID-2019 جەڭىل فورمادا وتكەن. وسى ەكى كورسەتكىشتى قوسساق، 70 پايىزدان اسىپ كەتەدى. ياعني، ەش بەلگىسى جوق، جەڭىل تۇردەگى اۋرۋلار % 70-75 ارالىعىندا بولىپ وتىر. سونىڭ ىشىندە ورتاشا دارەجەدە - % 20، اۋىر دارەجەدە -%2»، - دەپ اتاپ ءوتتى د. باەشيەۆا فەيسبۋك جەلىسىندە وتكەن ونلاين سۇحباتتا.
ونىڭ ايتۋىنشا، سيمپتومسىز ناۋقاستار ىشىندە دە ۋاقىت وتە كەلە اۋرۋ بەلگىلەرى پايدا بولادى. «ءبىزدىڭ ەسەبىمىز بويىنشا، ۋاقىت وتە كەلە سيمپتومسىز كەلگەن ناۋقاستاردىڭ % 15 - كوروناۆيرۋستىڭ جەڭىل تۇرىنە اۋىسادى، كەيبىرى ورتاشا تۇرىنە، ال 3 ادام نەمەسە % 0,5 - اۋىر دارەجەگە اۋىسقان. سيمپتومسىز ناۋقاستى 14 كۇن باقىلاعاننىڭ وزىندە دە ەش كورىنىس بولماۋى كەرەك. سول ادامدى ءبىز «سيمپتومسىز ناۋقاس» دەپ اتايمىز. كوبىنەسە 20-59 جاس ارالىعىنداعى تۇرعىنداردىڭ اۋرۋى سيمپتومسىز جانە جەڭىل تۇردە وتەدى»، - دەدى مامان.
ادەتتە سيمپتومسىز ناۋقاستاردىڭ بويىنان 2,3,4-كۇندەرى اۋرۋ بەلگىلەرى پايدا بولادى. سوندىقتان، سيپمتومسىز ناۋقاستار ۇيگە جىبەرىلسە دە، ولاردىڭ دەنساۋلىعىنا مونيتورينگ جۇرگىزىلەدى.
«ماسەلەن، ەكىنشى كۇننەن باستاپ، ناۋقاستاردىڭ 10 پايىزىندا دەنە قىزۋى پايدا بولعان. سونىمەن بىرگە، جوتەل، تاماق اۋرۋى، مۇرىننىڭ بىتەلۋى نەمەسە ءيىس سەزبەۋى بايقالعان. جەڭىل تۇردە وتەتىن بولسا، ول ادامداردى دا ۇيدە ەمدەيمىز. ول كىسىلەرگە ەش ەم كەرەك ەمەس. ويتكەنى ەش كلينيكالىق كورىنىس جوق. ءبىراق، ول كىسىلەر ەپيدەميولوگيالىق تۇرعىدا قاۋىپتى. سيمپتومدارى بار ادامدار دەنە قىزۋى، جوتەل، باس اۋرۋى سەكىلدى كلينيكالىق كورىنىستەرى بولادى. اسىرەسە جوتەلگەن، تۇشكىرگەن ادامدار اسا قاۋىپتى. ولار ءوز سىلەكەيىمەن بىرگە ۆيرۋستى اۋاعا، قاسىنداعى ادامعا شاشىراتۋى مۇمكىن. ۆيرۋستىڭ سىرتىندا مايلى قابىرشاعى بولادى، سوندىقتان بۇل ۆيرۋس ادامعا جابىسقاق بولىپ كەلەدى. قولدى سابىنمەن جۋۋ جانە سپيرتپەن ءسۇرتىڭىز دەپ ءجيى ايتامىز. سەبەبى، سپيرت پەن سابىن مايدى ەرىتىپ جىبەرەدى»، - دەدى ديناگۇل باەشيەۆا.
اۆتور: ايجان سەرىكجان قىزى
