مەملەكەتتىك ورگانداردىڭ حالىق الدىنداعى بەدەلى قاجەتتى دەڭگەيدە ەمەس - مۇرات ابەنوۆ
«قازىر تەك قازاقستاندا عانا ەمەس، دۇنيەجۇزىندە بولىپ جاتقان ساياسي-قوعامدىق پروتسەسس بارلىعىن ويلاندىرادى. بۇل، تەك بىزدە ەمەس. امەريكا، ەۋروپانى الىپ قارايتىن بولساق، ازاماتتىق قوعامنىڭ دامۋ دەڭگەيى وتە جوعارى جانە بۇرىنعى باسقارۋ جۇيەلەرى ءوز دەڭگەيىندە قىزمەت اتقارىپ جاتىر دەپ ايتا المايمىز. جۇرت كوشەگە شىعىپ، ءارتۇرلى تالاپتارىن قويىپ ءجۇر. مەملەكەتتىك ورگاندار بارلىق جاعدايدا سوعان قاجەتتى شەشىمدەر قابىلداپ ۇلگەرمەي جاتقانىن بايقاپ وتىرمىز. ءدال وسى پروبلەمالار بىزدە دە بار. ونى كورىپ تە جۇرسىزدەر. وكىنىشكە وراي، مەملەكەتتىك ورگانداردىڭ حالىق الدىنداعى بەدەلى كوپ جاعدايدا قاجەتتى دەڭگەيدە ەمەس. ءوزارا سەنىم جوق»، - دەدى ۇلتتىق قوعامدىق سەنىم كەڭەسىنىڭ مۇشەسى «Nur Otan» پارتياسى جاقتاستارى ليگاسىنىڭ قۇرىلۋىنا وراي وتكەن باسپا ءسوز ءماسليحاتىندا.
ونىڭ اتاپ وتۋىنشە، مۇنداي پروبلەمالاردىڭ تۋىنداۋىنا قوعامدىق باقىلاۋدىڭ جوقتىعى جانە حالىق كوتەرگەن ماسەلەلەردىڭ بيلىكتىڭ ەستىمەۋى سەبەپ بولىپ وتىر.
«ال مۇنى كىم كوتەرىپ، كىم ايتۋى قاجەت؟ وزدەرىڭىز بىلەسىزدەر، وتكەن جىلى ۇلتتىق قوعامدىق سەنىم كەڭەسى قۇرىلدى. ونىڭ ءبىرىنشى وتىرىسىندا پرەزيدەنت قاسىم-جومارت توقايەۆ «پارلامەنتتىڭ مارتەبەسىن، بەدەلىن كوتەرۋىمىز قاجەتتىگىن، پارلامەنت حالىقتىڭ ءۇنىن بيلىككە جەتكىزۋى كەرەكتىگىن» ايتتى. سوندىقتان حالىقتىڭ ءۇنىن بيلىككە جەتكىزەتىن پارلامەنت قالىپتاستىرۋ قاجەت»، - دەدى مۇرات ابەنوۆ.
وسى ورايدا ول «Nur Otan» پارتياسىندا جاقسى وزگەرىستەر ورىن الىپ، ىشكى تازارتۋ جۇرگىزىلىپ جاتقانىنا نازار اۋدارتتى.
«Nur Otan» پارتياسى جاڭا سايلاۋدا پرايمەريزم ارقىلى پارتياعا مۇشە ەمەس ازاماتتاردى پارلامەنتكە، جەرگىلىكتى ءماسليحاتقا ۇسىنامىز دەپ جاتىر. مەنىڭ ويىمشا، جاقسى ءارى باتىل باستاما. سەبەبى كوپ پارتيا مۇندايدان قورقادى. ال «Nur Otan» قازىر قوعامعا جاقسى بەلگى بەرىپ جاتىر. بەلسەندى بولساڭىز - سىرتتا قالماڭىز، «Nur Otan» پارتياسى سىزدەرگە مۇمكىندىك بەرەدى»، - دەدى ول.
