«ەلباسى مەدالى» جوباسىنا قاتىسۋ شارتتارى قانداي

نۇر-سۇلتان. قازاقپارات - نۇر-سۇلتان قالاسىنىڭ اكىمدىگىندە «ەلباسى مەدالى» جوباسىنا قاتىسۋ تالاپتارى ءتۇسىندىرىلدى، دەپ حابارلايدى قازاقپارات ءتىلشىسى.

«2019 -جىلى ق ر تۇڭعىش پرەزيدەنتى - ەلباسى بەلسەندى جانە تالانتتى جاستاردى قولداۋ بويىنشا «ەل ءۇمىتى» جالپىۇلتتىق ساياساتىن ۇسىندى.

بۇل باستاما اياسىندا ق ر تۇڭعىش پرەزيدەنتى - ەلباسى قورى دارىندى بالالاردى انىقتايتىن «قابىلەت»، «ەلباسى مەدالى» سىندى بىرنەشە بىرەگەي جوبانى قولعا الدى.

«ەلباسى مەدالى» باعدارلاماسىنا قاتىسۋ ءتارتىبى ۇكىمەت قاۋلىسىمەن بەكىتىلىپ، تۇڭعىش پرەزيدەنت قورىنىڭ قولداۋىمەن ءوتىپ جاتىر. ونىڭ باستى ماقساتى - وسكەلەڭ ۇرپاقتى قولداۋ جانە ىنتالاندىرۋ»، - دەدى نۇر-سۇلتان قالالىق ءبىلىم باسقارماسى باسشىسى شولپان قادىروۆا اكىمدىكتە وتكەن باسپا ءسوز ءماسليحاتىندا.

«ەلباسى مەدالى» جوباسىندا ءاربىر قاتىسۋشىعا ءوزىن-ءوزى دامىتۋ ءۇشىن جەتى باعىت ۇسىنىلعان: «سپورت جانە دەنە شىنىقتىرۋ»، «كىتاپ وقۋ»، «دارىن مەن داعدى» ، «ۇلتتىق مۇرا»، «ەرىكتىلىك»، «تۋريستىك ساياحاتتار» جانە «ەڭبەك تاجىريبەسى».

باعدارلامانى ازىرلەۋدە ۇزدىك الەمدىك تاجىريبە قولدانىلعان. «بايقاۋعا قاتىسۋشىلار جاسى 14 پەن 29 جاس ارالىعىندا بولۋ - باعدارلامانىڭ نەگىزگى شارتىنىڭ ءبىرى. ال ولار قايدا تۇرىپ جاتىر، ءبىلىمى قانداي، ماماندىعى نە، بۇل جاعى ماڭىزدى ەمەس.

«ەلباسى مەدالىن» ماقساتىنا ۇمتىلعان ءاربىر قازاقستاندىق جاس بۋىن يەلەنە الادى. باعدارلاماعا قاتىسۋ ءۇشىن me.fpp.kz ونلاين پلاتفورماسىنا تىركەلىپ، ۇسىنىلعان «التىن»، «كۇمىس» نەمەسە «قولا» باعىتتارىن تاڭداۋ كەرەك. سودان كەيىن وزىڭىزگە ارنايى بەكىتىلگەن تالىمگەردىڭ كومەگىمەن ءوز قالاۋىڭىزعا ساي ءىس-شارالار مەن كەستەنى تاڭداپ، جەكە دامۋ باعدارلاماسىن جاساي الاسىز. مۇمكىندىگى شەكتەۋلى جاندار دا باعدارلاماعا قاتىسا الاتىنداي كەستە قۇرۋعا جاعداي جاسالادى»، - دەدى سپيكەر.

ونىڭ ايتۋىنشا، باعدارلاما شەڭبەرىندە ەرىكتىلەردىڭ قىزمەتى، مەملەكەت باسشىسىنىڭ ۆولونتەر جىلىنىڭ اشىلۋىندا ايتقان مىندەتتەرىنە سايكەس بولادى.

«ەلباسى مەدالى» جاستاردىڭ تەك ءبىلىمىنىڭ جانە تابىسىنىڭ سيمۆولى عانا بولىپ قالمايدى. بولاشاق مەكتەپ تۇلەكتەرى ءۇشىن دە ەلدەگى ج و و- لاردا بىلىمدەرىن جالعاستىرۋعا باعىتتالعان تىڭ قادام. مەدال يەگەرلەرىنىڭ ۇپايلارى تەڭ بولعان جاعدايدا ق ر زاڭناماسىندا بەلگىلەنگەن تارتىپپەن ءبىلىم گرانتىن جانە قالا اكىمىنىڭ گرانتىن الۋعا تولىق قۇقىعى بار.

ارينە، بۇل - جاعىمدىق جاڭالىق. ەلوردادا دا «ەلباسى مەدالى» باعدارلاماسىن دامىتۋعا بارلىق شارالار قولعا الىندى. باعىن سىناماققا ۇمتىلعان جاستار ءۇشىن اكىمدىكتەن قاجەتتى قاراجات ءبولىندى. ناتيجەسىندە، قالامىز بويىنشا ءدال قازىر 1351 ادام باعدارلاماعا قاتىسۋعا ءوتىنىش بەرگەن، ولاردىڭ قاتارى ءالى دە ارتادى»، - دەدى ش. قادىروۆا.

بۇعان دەيىن «ەلباسى اكادەمياسى» ك ق ديرەكتورىنىڭ ورىنباسارى ءانۋار جانعوزين جاڭا جوبا تۋرالى پىكىر بىلدىرگەن ەدى.

اۆتور: ايجان سەرىكجان قىزى