كوروناۆيرۋستان ءولىم قاۋپىن ازايتاتىن ءدارى انىقتالدى

نۇر-سۇلتان. قازاقپارات - دەكسامەتازون پرەپاراتى كوروناۆيرۋس جۇقتىرىپ، جاساندى تىنىس الدىرۋ اپپاراتىنا قوسىلعان ناۋقاستاردىڭ جاعدايىن وڭالتۋعا كومەكتەسەدى.

مۇنداي شەشىمگە ۇلى بريتانيا عالىمدارى كەلگەن. بۇل اقپارات وكسفورد ۋنيۆەرسيتەتىنىڭ سايتىندا جاريالانعان، - دەپ حابارلايدى Tengrinews.kz ءتىلشىسى.

RECOVERY كلينيكالىق زەرتتەۋى ۇلى بريتانيادا ناۋرىزدا باستالعان. جوباعا جالپى 11500 ناۋقاس 175 اۋرۋحانا بويىنشا قاتىسىپ، ءتۇرلى ءدارى-دارمەكتى سىناقتان وتكىزگەن.

جوبانىڭ 2104 قاتىسۋشىسىنا كۇنىنە دەكسامەتازوننىڭ 6 ميلليگرامى بەرىلگەن. عالىمدار پرەپاراتتى قولدانۋ جاساندى تىنىس الدىرۋ اپپاراتتارىنا قوسىلعاندار اراسىندا ءولىم قاۋپىن ۇشتەن بىرگە، ال وتتەگىن قاجەت ەتەتىندەر ءۇشىن بەستەن بىرگە ازايتاتىنىن انىقتاعان. ءدارى رەسپيراتورلىق قولداۋدى قاجەت ەتپەيتىندەر اراسىندا وڭ ناتيجە كورسەتپەگەن.

زەرتتەۋدىڭ باسى- قاسىندا جۇرگەن وكسفورد ۋنيۆەرسيتەتىنىڭ پروفەسسورى پيتەر حوربيدىڭ (Peter Horby) سوزىنشە، دەكسامەتازون - COVID-19 كەزىندە ءومىر ءسۇرۋ دەڭگەيىن جاقسارتاتىنى انىقتالعان العاشقى پرەپارات.

«بۇل - تىڭ جاڭالىق. دەكسامەتازون ەندى ناۋقاستاردى ەمدەۋ ستاندارتى بولۋى كەرەك. دەكسامەتازوننىڭ باعاسى قىمبات ەمەس جانە دۇنيە جۇزىندەگى ادامداردىڭ ءومىرىن قۇتقارۋ ءۇشىن قولدانۋعا بولادى»، - دەدى ول.

پروفەسسور مارتين لەندرەي RECOVERY زەرتتەۋىنىڭ الدىن الا ناتيجەسى بەلگىلى - دەكسامەتازون اۋىر رەسپيراتورلىق اسقىنۋلارى بار ناۋقاستار اراسىندا ءولىم قاۋپىن تومەندەتەتىنى كورسەتكەنىن ايتادى.