قوعام بەلسەندىلەرى ەلوردادا اۋدان اكىمدەرىنىڭ كەڭەسشىلەرى بولىپ تاعايىندالدى

نۇر-سۇلتان. قازاقپارات - ەلوردا اۋداندارىنىڭ اكىمدەرى سىبايلاس جەمقورلىققا قارسى شتاتتان تىس كەڭەسشىلەردى تاعايىندادى، دەپ حابارلايدى قازاقپارات قالا اكىمدىگىنە سىلتەمە جاساپ.

اتاپ ايتقاندا، كاسىبي مەدياتور عالىم اققاسوۆ ەسىل اۋدانى اكىمىنىڭ شتاتتان تىس كەڭەسشىسى، كاسىپكەر جانە بەلسەندى تۇرعىن ماكسيم نيكولايچۋك سارىارقا اۋدانى اكىمىنىڭ كەڭەسشىسى، «جاڭارۋ» رەسپۋبليكالىق قوعامدىق بىرلەستىگى قالالىق فيليالىنىڭ ەكى وكىلى، ادۆوكاتتار ازامات راحىمبەكوۆ پەن مۇراتباي جۇپباعانبەتوۆ الماتى جانە بايقوڭىر اۋداندارى اكىمدەرىنىڭ شتاتتان تىس كەڭەسشىلەرى بولىپ تاعايىندالدى.

بۇدان بىلاي ەلوردانىڭ ءار اۋدانىندا كەڭەسشىلەر تۇرعىندارمەن جانە اكىمدىكپەن سىبايلاس جەمقورلىقتىڭ الدىن الۋ، قوعامدىق باقىلاۋ ماسەلەلەرى بويىنشا ءوزارا ارەكەتتەسەدى. ولار سونداي-اق ىشكى سىبايلاس جەمقورلىقتى جويۋ جانە ازاماتتارعا جايلى جاعداي جاساۋ ماقساتىنداعى «ادالدىق الاڭى» جوباسى اياسىندا اۋدان اكىمدىكتەرىنىڭ جۇمىسىن ۇيلەستىرەتىن بولادى.

ەسكە سالا كەتەيىك، 2018-جىلدان باستاپ سىبايلاس جەمقورلىققا قارسى قىزمەت پەن قالا اكىمدىگىنىڭ باستاماسىمەن، جاقىندا قالانىڭ سىبايلاس جەمقورلىققا قارسى ءىس-قيمىل جونىندەگى اكىمىنىڭ شتاتتان تىس كەڭەسشىسى بولىپ تاعايىندالعان قالالىق ءماسليحات دەپۋتاتى ميراس شەكەنوۆ باسقاراتىن «استانا - ادالدىق الاڭى» جوباسى ىسكە قوسىلدى.