فۋتبول: چەمپيوندار ليگاسىنا قاتىسقان بارلىق كوماندانىڭ رەيتينگى جاريالاندى

نۇر-سۇلتان. قازاقپارات - UEFA رەسمي سايتى چەمپيوندار ليگاسى تاريحىندا وعان قاتىسقان بارلىق كوماندانىڭ رەيتينگىسىن جاريالادى، دەپ حابارلايدى قازاقپارات ءتىلشىسى.

رەيتينگىگە ىرىكتەۋ كەزەڭى مەن فينالدىق ساتىسىنداعى بارلىق ويىندار كورسەتكىشى نەگىزگە الىندى.

تىزىمدە 600 ۇپايمەن يسپانيانىڭ «رەال مادريد» كومانداسى كوش باستاپ تۇرسا، ودان كەيىنگى ورىنداردا گەرمانيانىڭ «باۆاريا» (476 ۇپاي) جانە يسپانيانىڭ «بارسەلونا» (447 ۇپاي) كلۋبتارى تۇر.

بۇل تىزىمگە بارلىعى 7 قازاقستاندىق كوماندا كىرەدى. ولاردىڭ اراسىندا اتالعان تۋرنيردە بەس مارتە باق سىناپ، بارلىعى 30 ويىن (11 جەڭىس، 10 تەڭ ويىن، 9 جەڭىلىس) وتكىزگەن «استانا» 32 ۇپايمەن 106-ورىنعا جايعاسقان.

ال 18 ۇپاي ەنشىلەگەن «اقتوبە» - 142، 9 ۇپايى بار قاراعاندىنىڭ «شاحتەرى» - 226، 2 ۇپايى بار «استانا-1964» (بۇرىنعى «جەڭىس») - 297 ورىندا تۇر. ال الماتىنىڭ «قايراتى» - 371، پاۆلوداردىڭ «ەرتىسى» - 420، قوستانايدىڭ «توبىلى» 430-ورىنعا تابان تىرەدى.