قازاقستاندىقتاردىڭ جەدەل جاردەم قىزمەتىن شاقىرۋى جيىلەپ كەتتى

نۇر- سۇلتان. قازاقپارات - دەنساۋلىق ساقتاۋ ۆيتسە- ءمينيسترى ءلاززات اقتايەۆا قازاقستاندىقتاردىڭ جەدەل جاردەم قىزمەتىن ءجيى شاقىرا باستاعانىن ءمالىم ەتتى، دەپ حابارلايدى قازاقپارات ءتىلشىسى.

«جەدەل جاردەم قىزمەتىن شاقىرۋ جاعدايى ارتىپ بارا جاتقانىن اتاپ ءوتۋ كەرەك. وتكەن جىلدىڭ ءدال وسىنداي كەزەڭىمەن دە، وتكەن اپتانىڭ كورسەتكىشىمەن دە سالىستىرىپ كوردىك. قالالار مەن وڭىرلەردە، اسىرەسە نۇر- سۇلتان قالاسىندا جەدەل جاردەم قىزمەتىن شاقىرۋ جاعدايى جيىلەپ كەتكەن. بۇرىن تاۋلىگىنە مىڭ رەت شاقىرىلسا، قازىرگى ءوسىم 2-2,5 مىڭعا دەيىنگى شاقىرۋدى كورسەتىپ وتىر. حالىققا ايتارىمىز: ەگەر ومىرىڭىزگە قاۋىپ ءتونىپ تۇرعان جاعدايدا 103 نومىرىنە حابارلاسۋ كەرەك. جەدەل جاردەم قىزمەتى «ءدال وسى جەردە ءارى ءدال قازىر» قاعيداتى بويىنشا قىزمەت كورسەتەدى. ايتسە دە، قاۋىپ جوق كەزدە دە شاقىرىپ جاتاتىندار كەزدەسەدى»، - دەدى ءلاززات اقتايەۆا دەنساۋلىق ساقتاۋ مينيسترلىگىنىڭ «مينيسترلىك حابارلايدى» ايدارى بويىنشا Facebook-تەن سويلەگەن سوزىندە.

ول ءوز سوزىندە جەدەل جاردەم قىزمەتىنىڭ جانىندا call-ورتالىق بارىن اتاپ ءوتتى. ول ارقىلى ءتيىستى كەڭەس الۋعا مۇمكىندىك بار. «جەدەل جاردەمگە حابارلاسقان ادام call-ورتالىقتاعى دارىگەرگە قوسىپ بەرۋىن دە ءوتىنىپ، كەرەكتى اقپاراتتى الا الادى. سونىمەن قاتار، ءاربىر وڭىردە call-ورتالىقتىڭ بارىن دا اتاپ ءوتۋ كەرەك»، - دەدى ءلاززات اقتايەۆا.

ۆيتسە- مينيستر، سونداي- اق، ينفەكسيالىق اۋرۋحانالارعا توسەك ورىندارى جەتكىلىكتى ەكەنىن اتاپ ءوتتى. «قازىرگى تاڭدا بۇكىل ەلدەگى اۋرۋحانالاردا 7372 ينفەكسيالىق توسەك ورىن ازىرلەنگەن. وندا ورنالاسۋ دەڭگەيى — شامامەن % 68. كوپ ورنالاسقان وڭىرلەر دە بار. ولار ايماقتاردىڭ قاتارىنا پاۆلودار، الماتى، ش ق و، اقمولا وبلىستارى مەن نۇر- سۇلتان قالاسىن جاتقىزۋعا بولادى»، - دەدى ءلاززات اقتايەۆا.

اۆتور: ايان بەكەن ۇلى