تۇركىستانداعى جاڭا نىسانداردىڭ قۇرىلىسى قارقىندى جۇرگىزىلۋدە
بۇگىن وبلىس باسشىسى ءومىرزاق شوكەيەۆ قالاداعى قۇرىلىسى ءجۇرىپ جاتقان نىسانداردى ارالاپ شىقتى، دەپ حابارلايدى قازاقپارات ءتىلشىسى.
كوپ پاتەرلى تۇرعىن ءۇيدىڭ ساپاسىن تەكسەرىپ شىققان ايماق باسشىسى قۇرىلىسشىلارعا ساقتىق شارالارىن كۇشەيتە وتىرىپ، جۇمىستى توقتاتپاۋدى تاپسىردى. ءومىرزاق شوكەيەۆ سونداي- اق، 7 مىڭ ادامعا لايىقتالعان الىپ ستاديوننىڭ قۇرىلىسىن كوردى. وڭىردە فۋتبول باسەكەلەرى، ءىرى سپورتتىق دودالار مەن مادەني ءىس- شارالار وتەتىن سپورت نىسانى «سامۇرىق قازىنا» ۇلتتىق ءال- اۋقات قورىنىڭ دەمەۋشىلىگىمەن سالىنۋدا. مۇندا 2 سپورت زالى، تابيعي فۋتبول الاڭى، اكىمشىلىك بولمەلەر بار. سپورت كەشەنى پايدالانۋعا بەرىلگەن سوڭ بۇل جەردە فۋتبولدان قازاقستان رەسپۋبليكاسى چەمپيوناتىنىڭ پرەمەر- ليگا، ءبىرىنشى جانە ەكىنشى ليگا كوماندالارىنىڭ ويىندارى وتەتىن بولادى.
تۇركىستان قالاسىنىڭ اجارىن ارتتىرعان تاعى ءبىر نىسان «پاراسات» ساياباعى دا ەرەكشە كەيىپكە ەنىپ كەلەدى. مۇندا قايتا جاڭارتۋ جۇمىستارى اياسىندا جاساندى كول مەن كوپىرلەر سالىنىپ، 420 مەترلىك تاسارىق كەلەسى ايدىڭ سوڭىندا تولىعىمەن اياقتالماق. ناتيجەسىندە ساياباق سۋمەن قامتىلىپ، ول قايتادان «ارىس- تۇركىستان» كانالىنا جىبەرىلەدى دەپ جوسپارلانعان. ال، تۇركىستان- كەنتاۋ باعىتىنداعى جولدىڭ ەكى شەتىندەگى تاسارىقتىڭ ءبىر بولىگى «پاراساتتى» سۋمەن قامتىسا، ەكىنشى بولىگى جول بويىنداعى جاسىل جەلەكتى سۋعارادى.
ءومىرزاق ەستاي ۇلى تۇركىستاننىڭ برەندىنە اينالاتىن نەگىزگى جوبالاردىڭ ءبىرى - «كەرۋەن سارايدىڭ» قۇرىلىس اۋماعىندا دا بولدى. «Sembol contruction» كومپانياسى سالىپ جاتقان نىساننىڭ قۇرىلىسى بيىل قىركۇيەك ايىندا اياقتالادى دەپ كۇتىلۋدە. وبلىس اكىمى ءتيىستى باسقارما باسشىلارىنا اباتتاندىرۋ مەن كوگالداندىرۋ جۇمىستارىن بەكىتىلگەن كەستەگە ساي اياقتاۋدى تاپسىرىپ، قۇرىلىستىڭ ساپاسى قاتاڭ باقىلاۋدا ەكەنىن ەسكەرتتى.
اۆتور: اينۇر اقبايەۆا
