كوروناۆيرۋس: اتىراۋدا تاعى ەكى ادام قايتىس بولدى

اتىراۋ. قازاقپارات - بۇگىن اتىراۋ وبلىسىندا قاۋىپتى ىندەتتەن تاعى ەكى ادام قايتىس بولدى، دەپ حابارلايدى قازاقپارات.

وبلىستىق دەنساۋلىق ساقتاۋ باسقارماسىنىڭ مالىمەتىنە قاراعاندا، بۇگىن كوروناۆيرۋس ينفەكسياسىنا شالدىققان تاعى ەكى ادام قايتىس بولعان. «قايتىس بولعانداردىڭ ەكەۋى دە ەر ادام. ونىڭ ءبىرى - 55 جاستا، ەكىنشىسى - 57 جاستاعى قۇلسارى قالاسىنىڭ تۇرعىنى. العاشقى ناۋقاس پروۆيزورلىق ستاتسيونارعا تۇسكەنگە دەيىن 5 كۇن اۋىرعان. سونان سوڭ ەمحاناعا مەديتسينالىق كومەك الۋعا جۇگىنگەن. اۋرۋحاناعا تۇسكەن كەزدە ەكى ناۋقاستا دا ينتوكسيكاتسيالىق سيندروم بولدى، دەم جەتپەي تۇردى، جاعدايى وتە اۋىر بولدى. بۇل پاتسيەنتتەرگە كوروناۆيرۋس ينفەكسياسى، ەكى جاقتى پوليسەگمەنتارلى پنيەۆمونيا دياگنوزى قويىلعان ەدى»، - دەپ حابارلادى وبلىستىق دەنساۋلىق ساقتاۋ باسقارماسىنان.

ەسكە سالا كەتەلىك، بۇدان بۇرىن جىلىويدا كوروناۆيرۋستان 48 جاستاعى ايەل قايتىس بولعان ەدى. قازىر اتىراۋدا قايتىس بولعاندار سانى 6 ادامعا جەتتى.

اۆتور: بەك مۇستافا