ۆاكسينا توڭىرەگىندەگى الىپ قاشپا ءسوز بەن اقيقات: مامان تۇسىندىرەدى

نۇر-سۇلتان. قازاقپارات – ق ر دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنە قاراستى «ۇلتتىق دارىلىك زاتتار مەن مەديتسينالىق بۇيىمداردى ساراپتاۋ ورتالىعى» باسقارماسىنىڭ ءتوراعاسى ارنۇر نۇربايەۆ ەكپەنىڭ زيانىنا قاتىستى ءتۇرلى الىپ قاشپا سوزدەرگە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ۆاكسينا ءوندىرىسى پروتسەسىنىڭ قالاي جۇرگىزىلەتىندىگىن، سونىمەن قاتار ۆاكسينا قۇرامىنا نە كىرەتىندىگىن بىلەتىندىكتەن پىكىر بىلدىرە كەتەيىن. ۇزاق ۋاقىتتان بەرى اديۋۆانت، پروتەين، قانت، فورمالدەگيد، سىناپ نە ءۇشىن قولدانىلاتىندىعىن تۇسىندىرۋگە تىرىسىپ كەلەمىز. ۆاكسينا ازىرلەۋ ءۇشىن ءتۇرلى تۇراقتاندىرعىشتاردى، يناكتيۆاتسيالاردى پايدالانۋ قاجەتتىگى تۋىندايتىن وتە كۇردەلى بيولوگيالىق تىزبەك قاجەت. ايتالىق فورمالدەگيد ۆيرۋستاردى، مىسالى پوليوميەليتتى يناكتيۆاتسيالاۋ ءۇشىن پايدالانىلادى»، - دەدى ول قازاقستانداعى مىندەتتى ەكپە ماسەلەسىن تالقىلاۋعا ارنالعان ونلاين كونفەرەنتسيا بارىسىندا. ونىڭ اتاپ وتۋىنشە، ۆاكسينا قۇرامىنداعى فورمالدەگيد كولەمى وتە از. ادامدار سۋ ىشكەندە، ازىق-تۇلىك تۇتىنعاندا فورمالدەگيدتى الدەقايدا كوپ الادى.

«جان-جاقتى ورتالىقتاندىرىلعان زەرتتەۋلەر بار. ولار تۇراقتى تۇردە وتكىزىلىپ تۇرادى. ورگانيكالىق زەرتتەۋلەر دە وتە كوپ وتكىزىلەدى. 10 داعان مىڭ ءتۇرلى زەرتتەۋلەر ۆاكسينا ءوندىرىسى بارىسىندا ءتۇرلى زاتتاردى پايدالانۋ مۇلدەم قاۋىپسىز ەكەندىگىن كورسەتىپ وتىر»، - دەدى ول. ورتالىق باسشىسى قازاقستاندىق زەرتحانالاردىڭ ەۋروپالىق ساپا ستانتارتىنا تولىق ساي كەلەتىندىگىن دە باسا ايتتى.