ۇ ب ت-عا دايىندىقتا قانداي كەمشىلىكتەر بار - ورتالىق ديرەكتورى ايتتى

نۇر-سۇلتان. قازاقپارات - ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ۇلتتىق ءبىرىڭعاي تەست وتكىزۋگە دايىندىق بارىسىنداعى كەمشىلىكتەردى ايتتى، دەپ حابارلايدى قازاقپارات ءتىلشىسى.

«جالپى، بارلىق ۇلتتىق ءبىرىڭعاي تەست وتكىزۋ پۋنكتتەرى دايىن دەپ ايتۋعا بولادى. ءبىراق، بىرنەشە كەمشىلىك بار. مىسالى، ونلاين ترانسلياتسيا ۇيىمداستىرۋ ءۇشىن ءبىز 2 جولىن قاراستىردىق. ءبىر ترانسلياتسيانى جەرگىلىكتى اتقارۋشى ورگاندار جانە ءبىز ءبىر ترانسلياتسيا ۇيىمداستىرامىز. ويتكەنى، ءبىر ترانسلياتسيادا اقاۋ بولسا، ەكىنشىسى ءاردايىم قولجەتىمدى بولادى. قازىرگى ۋاقىتتا قوستاناي وبلىسىنىڭ ءجىتىقارا قالاسىندا ماسەلەلەر بار. وكىنىشكە وراي، ءتيىستى جۇمىستار ۇيىمداستىرىلمادى»، - دەدى ديدار سماعۇلوۆ ءبىلىم جانە عىلىم مينيسترلىگىنىڭ ونلاين فورماتتا وتكەن اپپارات جينالىسىندا.

ونىڭ ايتۋىنشا، مەملەكەتتىك كوميسسيا وتىراتىن دالىزدەردە 103 ارنايى كامەرا ورناتىلعان. 43 پۋنكتتە 20-ماۋسىمعا دەيىن كامەرالار ورناتىلادى.

«ءبىراق، ۇلتتىق ءبىرىڭعاي تەست وتكىزىلەتىن 15 پۋنكتتە جۇمىس ءتيىستى دەڭگەيدە وتەدى دەپ ايتا المايمىن. 108 پۋنكتتە بارلىق ماتەريال جينالاتىن دالىزدەردە كامەرا بار. 41 پۋنكتتە 20-ماۋسىمعا دەيىن ۇيىمداستىرىلادى. ال 12 پۋنكتتە مۇنداي جۇمىس ۇيىمداستىرىلماعان»، - دەدى ورتالىق ديرەكتورى. وسى ورايدا ق ر ءبىلىم جانە عىلىم ءمينيسترى اسحات ايماعامبەتوۆ ۇ ب ت وتكىزۋگە دايىندىق جۇمىستارىنىڭ بارلىعى 17-ماۋسىمعا دەيىن اياقتالۋى تيىستىگىن اتاپ ءوتتى.

«ەرتەڭ بارلىق پۋنكتتى قابىلداپ الامىز. ءالى دە ءبىز قويعان تالاپتارعا ساي جۇمىس جۇرگىزۋگە ۋاقىت بار. بيىل وتە ۇلكەن ءارى قاتاڭ تالاپ قويىپ وتىرمىز. سانيتايزەرلەر قويۋ، ماسكامەن قامتۋ جۇمىستارىن رەتتەۋ قاجەت. بيىل كالكۋلياتورعا رۇقسات بەرۋ شەشىمىن قابىلدادىق. سوندىقتان بارلىق ماسەلەنى شەشىپ، 17-ماۋسىم كۇنى مەنىڭ دەڭگەيىمدە رەسپۋبليكا بويىنشا بارلىق پۋنكتتەردىڭ، ءبىلىم باسقارمالارىنىڭ باسشىلارىمەن جينالىس وتكىزەمىز. سول جينالىستا بارلىق ماسەلەنى قاراستىرامىز»، - دەدى مينيستر.