تىيىم سالىنعان زاتپەن بىلىكتىلىك تەستىلەۋىندە ۇستالعان مۇعالىم «جۇلدىزعا» اينالۋى مۇمكىن

نۇر-سۇلتان. قازاقپارات - ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ۇلتتىق بىلىكتىلىك تەستىلەۋىندە تىيىم سالىنعان زات پايدالانعان مۇعالىمدەر تۋرالى بەينەروليك ءتۇسىرىپ، الەۋمەتتىك جەلىدە تاراتۋدى ۇسىندى، دەپ حابارلايدى قازاقپارات ءتىلشىسى.

«ۇلتتىق بىلىكتىلىك تەستىلەۋىندە تىيىم سالىنعان زاتتاردى پايدالانعان مۇعالىمدەرگە قاتىستى بەينەروليك شىعارىپ، الەۋمەتتىك جەلىلەر ارقىلى تاراتۋدى ۇسىنامىز. ويتكەنى، سوزبەن دە ايتتىق، جينالىستاردا دا ەسكەرتتىك. تەستىلەۋ وتەتىن جەرگە ءبىلىم باسقارمالارىنىڭ وكىلدەرى دە كەلەدى. ءبىراق، وكىنىشكە وراي جاعدايدىڭ جاقساراتىن ءتۇرى جوق. مۇعالىمدەر تىيىم سالىنعان زاتتاردى قولدانۋعا تىرىسادى. سوندىقتان ءبىزدىڭ ۇسىنىسىمىز، ناقتى فاكتىلەر بويىنشا قاي وبلىستىڭ ءمۇعالىمى ەكەندىگىن كورسەتىپ، بەينەروليكتەر تاراتساق»، - دەدى ديدار سماعۇلوۆ ءبىلىم جانە عىلىم مينيسترلىگىنىڭ ونلاين فورماتتا وتكەن اپپارات جينالىسىندا.

وسى ورايدا ق ر ءبىلىم جانە عىلىم ءمينيسترى اسحات ايماعامبەتوۆ بۇل ۇسىنىستى زاڭنامالىق تۇرعىدا قاراستىرۋ قاجەتتىگىن باسا ايتتى.

«ويتكەنى، بۇل جەكە ادامنىڭ قۇقىعىنا قاتىستى. ارينە، ءبىز ءبىر جاعىنان ۇستازداردىڭ مارتەبەسى دەسەك، ەكىنشى جاعىنان وسىنداي كەلەڭسىز جاعدايلار بولعاندا ونى دا ايتۋىمىز كەرەك. بەس ساۋساق بىردەي ەمەس. كەيبىر ارىپتەستەرىمىز زاڭعا قايشى قىلىقتارى بولسا ءتيىستى شارا قولدانۋىمىز قاجەت. وتە قاتاڭ شارا قولدانىلاتىن بولادى. ەكى جۇمانىڭ ىشىندە 296 مۇعالىم زاڭسىز ارەكەتكە بارعان. بىرىنشىدەن، قۇقىق قورعاۋ ورگاندارى ءتيىستى جۇمىس جۇرگىزىپ باستادى. ەكىنشىدەن، ءبىزدىڭ كوميتەت ءوز جۇمىسىن باستاۋى ءتيىس. ۇشىنشىدەن، ءبىلىم باسقارمالارى، بولىمدەر، مەكتەپ باسشىلارى ءار فاكتى بويىنشا قىزمەتتىك تەكسەرۋ جۇرگىزىپ، ناقتى شارا قولدانۋى كەرەك. اكادەميالىق ادالدىق دەگەن وسىدان باستالادى»، - دەدى اسحات ايماعامبەتوۆ.