بىلىكتىلىك تەستى: شىمكەنتتىك مۇعالىم ءوز ورنىنا باسقا ادامدى كىرگىزبەك بولعان

نۇر-سۇلتان. قازاقپارات - شىمكەنتتىك ءمۇعالىم ۇلتتىق بىلىكتىلىك تەستىنە ءوز ورنىنا باسقا ادامدى كىرگىزبەك بولعان.

بۇل تۋرالى ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ايتتى، دەپ حابارلايدى قازاقپارات ءتىلشىسى.

«بۇگىنگە دەيىن 25108 ءوتىنىش تۇسكەن بولاتىن. ونىڭ ىشىندە تەستىلەۋدەن 12549 پەداگوگ ءوتتى، 50 پايىزعا جاقىن. ورتاشا بالل - 61. وكىنىشكە وراي پاندەمياعا بايلانىستى الماتى وبلىسىندا تەستىلەۋدى ءالى باستاعان جوقپىز. ال شىعىس قازاقستان وبلىسىندا تەستىلەۋ 15-ماۋسىمدا باستالدى»، - دەدى ديدار سماعۇلوۆ ءبىلىم جانە عىلىم مينيسترلىگىنىڭ ونلاين فورماتتا وتكەن اپپارات جينالىسىندا.

وسى رەتتە ول مۇعالىمدەر اراسىندا تىيىم سالىنعان زاتتاردى پايدالانۋ فاكتىلەرى ءار وبلىستا تىركەلىپ جاتقانىن ايتتى.

«سونىمەن بىرگە ءوز ورنىنا باسقا ادامداردى الىپ كەلگەن مۇعالىمدەر دە كەزدەستى. ءقازىر 6 فاكتىگە بايلانىستى قۇقىق قورعاۋ ورگاندارىنا ءوتىنىش بەردىك. تىرگەۋ جۇمىستارى باستالدى. مۇنان بولەك، مۇعالىمدەر ءوز ورىندارىنا باسقا ادامدى جالعان جەكە قۇجاتتار جاساۋ ارقىلى دا كىرگىزۋگە تىرىسۋدا. بۇل ءىس بويىنشا دا قوسىمشا قۇقىق قورعاۋ ورگاندارىنا حابار بەردىك. شىمكەنتتە وسىنداي جاعداي تىركەلگەن»، - دەدى ورتالىق باسشىسى.

وسىعان وراي ءبىلىم جانە عىلىم ءمينيسترى اسحات ايماعامبەتوۆ: «جالعان جەكە كۋالىك جاساۋ فاكتىسى دالەلدەندى مە؟»، - دەپ سۇرادى.

«بۇل ماسەلە بويىنشا قۇقىق قورعاۋ ورگاندارىنا جۇگىندىك، دالەلدەندى. مۋزافپار ەلەمەسوۆ دەگەن ءمۇعالىم تەست تاپسىرۋعا جازىلعان ەدى. ءبىراق، ءوز ورنىنا باسقا ادامدى الىپ كەلگەن. ول كارتوندى لاميناتتاپ قۇجات جاساپ العان»، - دەدى ول.