قىتايدا كوروناۆيرۋس جۇقتىرعان ادامدار سانى ارتىپ كەلەدى
ق ح ر گيگيەنا جانە دەنساۋلىق ساقتاۋ ىستەرى جونىندەگى مەملەكەتتىك كوميتەتىنىڭ حابارلاۋىنشا، 11- ماۋسىمنان بەرى سوڭعى بەس كۇن ىشىندە كوروناۆيرۋس جۇقتىرعان جاڭا جاعدايلار سانى قىتاي استاناسىندا 100 ادامنان استى.
ولاردىڭ باسىم كوپشىلىگى بەيجىڭنىڭ وڭتۇستىك-باتىس بولىگىندەگى «سينفاندي» كوتەرمە ازىق-تۇلىك بازارىنان انىقتالدى.
بەيجىڭدەگى «فەنتاي» اۋدانىندا «اسكەري جاعداي رەجيمى» ەنگىزىلدى. وندا «سينفاندي» بازارىنا جاقىن ورنالاسقان 20 دان استام تۇرعىن ءۇي كەشەنى كارانتينگە جابىلدى.
كوروناۆيرۋستىڭ ورشۋىنە بايلانىستى بەيجىڭنىڭ باسقا اۋداندارىندا ەپيدەميولوگيالىق قاۋىپ دەڭگەيى كوتەرىلدى. بەيجىڭ بيلىگى بيىلعى جىلدىڭ 30- مامىرىنان بەرى وسى بازارعا كەلگەن 200 مىڭعا جۋىق تۇرعىننىڭ پاتەرلەرىن ارالاپ تەكسەرۋگە، 100 مىڭعا جۋىق الەۋمەتتىك قىزمەتكەردى جۇمىسقا تارتتى.
90 مىڭعا جۋىق تۇرعىن COVID-19 عا تەست تاپسىردى. جەرگىلىكتى ب ا ق- تىڭ حابارلاۋىنشا، بەيجىڭ قالاسى ينفەكتسيالىق اۋرۋلاردى باقىلاۋ جانە الدىن الۋ ورتالىعىنىڭ ساراپشىلارى ەلوردا حالقىن جاپپاي تەستىلەۋ قاجەت دەگەن قورىتىندىعا ءالى كەلگەن جوق.
ەسكە سالساق، قىتايدا ءبىر تاۋلىكتە 77 مىڭعا جۋىق ادام كوروناۆيرۋسكە تەست تاپسىردى. كەشە ۆيرۋستىڭ تارالۋىنا بايلانىستى بەيجىڭنىڭ ءۇش اۋدانى مەن ماڭىنداعى قالالاردا اسكەري جاعداي ەنگىزىلگەنى تۋرالى حابارلاعان ەدىك.
