ەلوردادا تۋريستەر اراسىندا ەڭ تانىمال ورىندار جاريالاندى

نۇر-سۇلتان. قازاقپارات - نۇر-سۇلتان قالاسى اكىمدىگى تۋريستەر اراسىندا ەڭ تانىمال قالاداعى ورىنداردى جاريالادى، دەپ حابارلايدى قازاقپارات.

«قالا تۇرعىندارى مەن قوناقتارى ءۇشىن ەڭ قولايلى جەر - مونۋمەنتالدى ونەر ەسكەرتكىشتەرى ورناتىلعان ساياباقتار. سونداي-اق «بايتەرەك» ساۋلەت قۇرىلىسى، «ماڭگىلىك ەل» سالتانات قاقپاسى، ەكسپو اۋدانى جانە ت. ب. ەرەكشە ورىندار»، - دەيدى «تاريحي-مادەني مۇرا ەسكەرتكىشتەرى مەن وبەكتىلەرىنىڭ ساقتالۋىن قامتاماسىز ەتۋ جونىندەگى ديرەكتسياسى» م ك ق ك ديرەكتورى ناريما مۇحامبەتالينا.

ەلوردانىڭ 20 جىلدىعىنا وراي «ايماقتاردىڭ استانا قالاسىنا تارتۋى» جوباسى اياسىندا بىرنەشە مادەني نىسان اشىلعان بولاتىن.

اتاپ ايتساق، قاراعاندى وبلىسى «قازاق ەلىنە مىڭ العىس» مونۋمەنتى مەن «ۇلىتاۋ» اللەياسىن سىيعا تارتتى. باتىس قازاقستان وبلىسى مانشۇك مامەتوۆانىڭ ەسكەرتكىشى مەن «اقجايىق» ساياباعىن تارتۋ ەتتى. سونداي-اق اقتوبە وبلىسى تاۋەلسىزدىك الاڭىنىڭ ورتاسىندا «بەيبىتشىلىك قابىرعاسى» مونۋمەنتىن ورناتتى.

اتىراۋ وبلىسى ەسىل وزەنىنىڭ جاعالاۋىنداعى جاڭا جاياۋ جۇرگىنشىلەر كوپىرىن سالىپ، تارتۋ ەتتى. ال قىزىلوردا وبلىسى ءوز قالاسىنىڭ ءمان-ماعىناسىنا ساي عارىشتىق سىيلىق جاسادى، ياعني اشىق اسپان استىنداعى زىمىران-عارىشتىق تەحنيكا مۇراجايىن اشتى.

ش ق و بوتانيكالىق باقتىڭ اۋماعىندا جارىق بەرەتىن مۋزىكالىق سۋبۇرقاق ورناتتى. سونىمەن قاتار الماتى وبلىسى بۇرىنعى «اراي» ەلوردالىق ساياباعىنا ءىرى ماسشتابى قايتا جوندەۋ جۇرگىزىپ، ونى «جەتىسۋ» دەمالىس ساياباعىنا اۋىستىرىپ، ىسكە قوستى.

ناريما ابىل قىزىنىڭ ايتۋىنشا، «تاريحي-مادەني مۇرا ەسكەرتكىشتەرى مەن وبەكتىلەرىنىڭ ساقتالۋىن قامتاماسىز ەتۋ جونىندەگى ديرەكتسياسى» قالاداعى تاريحي-مادەني مۇراسىن ساقتاۋ جانە ناسيحاتتاۋ ماقساتىندا ءتۇرلى ءىس-شارا وتكىزىپ تۇرادى. نۇر-سۇلتان قالاسىنىڭ وقۋشىلارى مەن ستۋدەنتتەرى ءۇشىن اشىق ساباقتار ۇيىمداستىرىپ، ەلوردا ەسكەرتكىشتەرىنىڭ جانىندا مادەني-كوپشىلىك ءىس- شارالار وتكىزەدى، جىل سايىن سالتاناتتى تۇردە گۇل شوقتارىن قويۋ ءراسىمىن جاسايدى.

ايتا كەتسەك، 2019-جىلى س. سەيفۋللين، ب. مايلين، ءى. جانسۇگىروۆتىڭ 125 جىلدىعىنا ارنالعان «ءۇش ارىس» ەسكەرتكىشى ورناتىلدى.

ەلوردادا مەملەكەتتىك ەسكەرتكىشتەر تىزىمىنە ەنەتىن 46 تاريحي-مادەني نىسان بار. ونىڭ ەكەۋى رەسپۋبليكالىق ماڭىزى بار تاريح جانە مادەني ەسكەرتكىشتەر قاتارىنا قوسىلعان.

بۇگىندە جاڭادان 51 نىسان انىقتالىپ، ەسەپكە الىنعان. ياعني، نۇر-سۇلتان قالاسى بويىنشا تاريح جانە مادەنيەت ەسكەرتكىشتەرىنىڭ جالپى سانى - 97. ونىڭ ىشىندە ساۋلەت جانە تاريح ەسكەرتكىشى - 46، مونۋمەنتالدى ونەر ەسكەرتكىشى - 38، ارحەولوگيا ەسكەرتكىشى -13.