تۇركىستان وبلىسىندا كارانتين رەجيمى جاعداي تۇراقتانعانعا دەيىن جالعاسادى

تۇركىستان. قازاقپارات - تۇركىستان وبلىسىندا كارانتين رەجيمى ەپيدەميولوگيالىق احۋال تۇراقتانعان كەزەڭگە دەيىن جالعاسادى.

بۇل تۋرالى بۇگىن وڭىرلىك كوممۋنيكاتسيالار قىزمەتىندە وتكەن بريفينگتە وبلىستىڭ باس سانيتار- دارىگەرى نۇربەك نىشانوۆ مالىمدەدى، دەپ حابارلايدى قازاقپارات ءتىلشىسى.

نۇربەك نىشانوۆتىڭ ايتۋىنشا، وڭىردە كوروناۆيرۋسقا قاتىستى ەپيدەميولوگيالىق احۋال تۇراقتانۋى ءۇشىن ءوسىم 1 اپتا كولەمىندە %5 دان اسپاۋى قاجەت. «ەگەر ءوسىم %2 دان اسپاسا، قوسىمشا جەڭىلدىكتەر ەنگىزىلۋىنە نەگىز بولادى. ال، ءوسىم كورسەتكىشى تومەندەمەگەن جاعدايدا، كارانتيندىك تالاپتار قايتا كۇشەيتىلەدى. قاراپايىم ساقتىق شارالارىنا ەرەكشە نازار اۋدارۋ تيىستىگىن تۇرعىنداردىڭ ەسىنە سالامىز. اتاپ ايتقاندا، ەكى جانە ودان كوپ ادامنىڭ بىرلەسىپ سەرۋەندەۋى كەزىندە بەتپەردە مىندەتتى تۇردە تاعىلۋى، الەۋمەتتىك قاشىقتىق (2 مەتردەن كەم ەمەس) ساقتالۋى ءتيىس»، - دەدى نۇربەك سادىقبەك ۇلى.

وبلىستىڭ باس سانيتار دارىگەرى سونداي-اق، تۇرعىندارعا قانداي نارسەلەرگە تيىم سالىنعانىن اتاپ ءوتتى.

«وتباسىلىق ءىس-شارالاردى جانە ويىن-ساۋىق، سپورتتىق جانە باسقا دا بۇقارالىق ءىس-شارالاردى وتكىزۋگە، ساۋدا-ويىن-ساۋىق ورتالىقتارى جانىنداعى بالالاردىڭ ويىن الاڭدارى مەن كينوتەاترلاردىڭ، تەاترلار مەن كورمەلەردىڭ، تۇنگى كلۋبتار مەن باتۋت جانە فۋدكورتتاردىڭ جۇمىسىنا، مال بازارلارىنىڭ قىزمەتىنە تيىم سالىنعان. كارانتين رەجيمىن جانە شەكتەۋ شارالارىن ساقتاماعان تۇلعالارعا ق ر زاڭناماسىندا بەلگىلەنگەن تالاپتارعا سايكەس، اكىمشىلىك جاۋاپكەرشىلىككە تارتۋ بويىنشا شارا قولدانىلادى»، - دەدى نۇربەك نىشانوۆ.

ايتا كەتەيىك، بۇگىندە وڭىردە كوروناۆيرۋس ىندەتىن جۇقتىرعان 594 جاعداي تىركەلگەن. اۋىرعانداردىڭ 7 ءى قايتىس بولىپ، 265 ادام جازىلىپ شىققان.