تۇركىمەندەر ءبىر اۋدانىڭىزدى سۇراسا بەرەر مە ەدىڭىز؟ - ون ءۇش جىل ۇكىمەت باسقارعان نۇرتاس وڭداسىنوۆ
ءبىر بولمەسىن تۇگەل كىتاپقا تولتىرىپ جۇمىس بولمەسى ەتىپ ارناپ الىپتى، تاڭعى شايىن ىشكەننەن كەيىن، قىرى سىنباعان كاستوم شالبارىن كيىپ ساعات 9-عا 10 مينۋت قالعاندا بولمەسىنە كىرىپ كەتەدى ەكەن.
سول وتىرعاننان تۇستە ساعات 13-كە 10 مينۋت قالعاندا شىعىپ، كەمپىرىنىڭ دايىنداعان تۇسكى تاماعىن ءىشىپ، ساعات 14-كە 10 مينۋت قالعاندا قايتا كىرىپ كەتەدى. كەشكى ساعات 18-گە 10 مينۋت قالعاندا بولمەسىنەن شىعىپ، ءبىر ساعات دالاعا سەرۋەندەپ، كەشكى 20:00-دە تاماعىن ءىشىپ دەم الادى ەكەن.
نۇرتاس اعامىز ءدال وسىلاي قاتىپ قالعان ۋاقىتپەن 28 جىل ءومىر ءسۇرىپتى. قازاقستاننان ادام كەلسە كەمپىرى جىلايدى ەكەن «مىنا اپەندى اعالارىڭا ايتساڭدارشى نە ىستەپ وتىر مىنا بولمەدە، ءۇش مەزگىل تاماعىن دايىنداۋمەن ولەتىن بولدىم» دەپ.
سوندا نۇرتاس اعامىز سول بولمەدە 28 جىل بويى قازاقتىڭ ءبىر ءسوزى ءتورت تىلدە قالاي اتالاتىنى جونىندە 5 تومدىق «ەنتسيكلوپەديالىق سلوۆار» جاساعان ەكەن.
نۇرتاس وڭداسىنوۆ ەستەلىگىنەن:
«... - سوعىس ءبىتىپ، ەل ءالى ەسىن جيىپ ۇلگەرمەگەن جىلدار. ماسكەۋدەگى وتەتىن جينالىستارعا ءجيى بارامىز. ءبىر جولى سونداي ءبىر جيىندى ۋكراينانىڭ سول كەزدەگى باسشىسى ن. س. حرۋشيەۆ جۇرگىزدى.
ونىڭ قاسىنا وزبەكستاننىڭ جەتەكشىسى وسمان يۋسۋپوۆ جايعاسىپتى. ءماجىلىس زالىنا كىرگەنىمدە ەكەۋى سىبىرلاسىپ وتىر ەكەن. شىنىمدى ايتسام، ەكەۋىن دە اسا ۇناتا قويمايتىن ەدىم، سوندىقتان كوزدەرىنە تۇسپەي- اق قويايىن دەپ ارت جاققا وتىرا بەرىپ ەدىم، حرۋشيەۆ كورىپ قالدى دا: ⠀
- وڭداسىنوۆ، تۇر ورنىڭنان! سەن نەگە وزبەكتەرگە انا ءۇش اۋداندى بەرگىڭ كەلمەيدى، وزبەكتەر ماقتانى جاقسى ەگەدى! - دەدى دىڭكىلدەپ. مىنا ءسوز مەنىڭ شىمبايىما باتىپ كەتتى:
- ول ءۇش اۋدان مەنىڭ جەرىم ەمەس، ونى بەرۋ- بەرمەۋدى حالىق شەشەدى! ال ماقتانى ءبىز دە جاقسى وسىرەمىز، وتكەن جىلى جوسپاردى اسىرا ورىندادىق! - دەدىم. ⠀
حرۋشيەۆ قىپ- قىزىل بولىپ كەتتى، اشۋلى ۇنمەن «وتىر!» دەدى. وعان ايتقىزىپ وتىرعان وسمان يۋسۋپوۆ ەكەنى داۋسىز.
ويتكەنى ونىڭ ءوزى ماعان ءبىر مارتە شىعىپ، وسى وسى ءۇش اۋداندى سۇراعان بولاتىن، سوندا مەن: «ءسىز دە ءبىر رەسپۋبليكانى باسقارىپ وتىرسىز، سىزدەن قىرعىزدار نەمەسە الدە تۇركىمەندەر ءۇش ەمەس، ءبىر اۋدانىڭىزدى سۇراسا بەرەر مە ەدىڭىز؟!» دەدىم.
ءۋاج ايتا الماي قالعان بولاتىن. ءوزىنىڭ ءسوزى وتپەگەن سوڭ داڭعوي حرۋشيەۆتى ايتاقتاپ سالىپ وتىرعان ءتۇرى عوي!»
... نۇرتاس وڭداسىنوۆ ەلىمىزدىڭ ەڭ قيىن كۇردەلى كەزەڭىندە ەل ۇكىمەتىن 13 جىل بويى باسقارىپتى. نەبارى 34 جاستا جوعارى قىزمەتتىڭ جاۋاپكەرشىلىگىن سەزىنگەن ەكەن.
جالپى، ونىڭ ونەگەلى ءىسىن كوزى قاراقتى زيالى قاۋىم جاقسى بىلگەنىمەن، جەكە تۇلعا رەتىندە قوعامدىق- ساياسي قىزمەتى عىلىمي تۇرعىدان ءوز باعاسىن الدى ما؟
شولپان امانگەلدى
