قىتاي «بەيدوۋ» ناۆيگاتسيا جۇيەسىنىڭ سوڭعى جەرسەرىگىن ۇشىراتىن كۇندى جاريالادى

«بەيدوۋ-3» ناۆيگاتسيا جۇيەسىنىڭ گەوستاتسيونارلىق جەرسەرىگى قىتايدىڭ وڭتۇستىك- باتىسىندا سىچۋان پرووۆينتسياسىنداعى «سيچان» عارىش ايلاعىنان ۇشىرىلادى. «ۇلى ساپار-3» زىمىران تاسىعىشى جەرسەرىكتى وربيتاعا جەتكىزەدى. ۇشىرىلىم بەيجىڭ ۋاقىتىمەن 16 -ماۋسىمدا ساعات 10:11 مەن 10:50 ارالىعىنا بەلگىلەنگەن. قازىر «بەيدوۋ-3» اپپاراتىن جەردەگى تەحنيكالىق سىناۋ جانە ۇشىرىلىم الدىنداعى باسقا دا تەحنيكالىق ازىرلىك جۇمىسى اياقتالعان.

ەسكە سالا كەتسەك، قىتايدىڭ «بەيدوۋ» ناۆيگاتسيا جۇيەسى ءۇش كەزەڭدە جۇزەگە اسىرىلدى. 2000 -جىلى قىتاي اۋماعىن قامتيتىن «بەيدوۋ-1» جۇيەسىنىڭ ءبىر بولىگى قالىپتاستىرىلدى، 2012 -جىلى ازيا- تىنىق مۇحيت ايماعىن قامتيتىن «بەيدوۋ-2»، 2020 -جىلى جاھاندىق ناۆيگاتسيالىق توپتى قامتيتىن «بەيدوۋ-3» قولعا الىندى. «بەيدوۋ-3» جۇيەسىندە 30 جەرسەرىك بار، ونىڭ 29-ى جەر اينالاسىنا وربيتاعا شىعارىلعان.

رۋسلان سۇلەيمەنوۆ