جاقىنىڭا جاناشىر بول: الماتىدا كوروناۆيرۋس جۇقتىرعانداردىڭ باسىم بولىگى - جاستار
2020 -جىلعى 8-14 -ماۋسىم ارالىعىندا سيمپتومدارمەن 219، اۋرۋ بەلگىسى جوق 616 جاعداي انىقتالدى. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى كامالجان نادىروۆ ونلاين بريفينگ بارىسىندا ءمالىم ەتتى، دەپ حابارلايدى قازاقپارات ءتىلشىسى.
«ءبىر اپتادا 150 ناۋقاس ەمدەلىپ شىقتى، جالپى جازىلعانداردىڭ سانى 2056 ادام. ەگەر اۋىرعان ادامداردىڭ جاس شاماسىنا قارايتىن بولساق نەگىزىنەن جاستار اراسىندا باسىم. مىسالى، 20-29 جاس ساناتىنىڭ ۇلەسىنە جۇقتىرعانداردىڭ جالپى سانىنىڭ %36،8 ى كەلەدى، 30-39 جاس ساناتىنىڭ اراسىندا - %18،9، 40-49 جاس ساناتىنىڭ ۇلەسىنە - %14،5، 50-59 جاس ساناتىنىڭ ۇلەسىنە - 11،7%، 60 جاستان جوعارى جانە ودان دا جوعارى ەگدە جاستاعى ادامدار اراسىندا جۇقتىرعانداردىڭ جالپى سانى % 8،1. سونداي-اق، بالالار مەن جاسوسپىرىمدەر اراسىندا تىركەلگەن جاعدايلار دا بار، 14 جاسقا دەيىنگى بالالار اراسىندا - %5،1 جانە 15-19 جاستاعى جاسوسپىرىمدەر اراسىندا- % 4،9»، - دەدى ول.
سونىمەن قاتار، كامالجان نادىروۆ ۆيرۋس جۇقتىرعانداردىڭ كوبى ناۋقاستارمەن بايلانىستا بولعاندار ەكەنىن جەتكىزدى.
پروفيلاكتيكالىق تەكسەرىس كەزىندە انىقتالعاندار - %56،7. سونداي-اق، تاۋەكەل توپتاعىلاردى تەكسەرۋ كەزىندە انىقتالعاندار - %33،9، ءوز بەتىنشە تەكسەرىلگەندەر - %9،4.
اۆتور: الما مۇقانوۆا
