قازاقستاندىق اسكەريلەر ماسكەۋگە كەلدى

ماسكەۋ. قازاقپارات - قازاقستاندىق اسكەري قىزمەتشىلەر پارادقا قاتىسۋ ءۇشىن ماسكەۋگە كەلدى، دەپ حابارلايدى قازاقپارات قورعانىس مينيسترلىگىنە سىلتەمە جاساپ.

قازاقستان قارۋلى كۇشتەرى دەسانتتىق- شابۋىلداۋشى اسكەري قىزمەتشىلەرىنىڭ سالتاناتتى ەسەبى جەڭىستىڭ 75 جىلدىعىنا ارنالعان اسكەري پارادقا قاتىسۋ ءۇشىن رەسەيگە كەلدى. پارادقا قاتىسۋشىلارى مىنگەن ۇشاق ماسكەۋ ماڭىنداعى «چكالوۆسكيي» اسكەري اۋە ايلاعىنا قوندى.

«دايىندىق كەزىندە قازاقستاندىق اسكەري قىزمەتشىلەر «زۆەنيگورودسكي» اسكەري شيپاجايىندا تۇرادى. پارادقا قاتىساتىندار جەرگىلىكتى ادامدارمەن قارىم- قاتىناستى جاساماۋ ءۇشىن جاتتىعۋدان باسقا ۋاقىتتا اۋماقتان شىعۋعا تىيىم سالىنادى. اسكەري قىزمەتشىلەر ماسكەۋگە كەتەر الدىندا كوروناۆيرۋسقا پ ت ر تەست تاپسىردى. ولار ءار ءۇش كۇن سايىن كوروناۆيرۋسقا قاتىستى پ ت ر تەست تاپسىرادى»، دەلىنگەن حابارلامادا.

دايىندىق الدىن الۋ جانە ەپيدەمياعا قارسى ءىس- شارالار كەشەنىن ورىنداي وتىرا، كارانتين شارالارىن قاتاڭ ساقتاۋ ارقىلى جۇزەگە اسىرىلادى. اتاپ ايتقاندا: تاۋلىگىنە ەكى رەت مەديتسينالىق تەكسەرۋ، نىسانداردى سانيتارلىق وڭدەۋ جانە جەلدەتۋ، اسكەري قىزمەتشىلەردى قاجەتتى دەزينفەكسيالاۋ جانە مەديتسينالىق جەكە قورعانىس قۇرالىمەن قامتاماسىز ەتۋ. جاتتىعۋلار ماسكەۋ ماڭىنداعى «الابينو» پوليگونىندا وتەدى. جالپى پاراد ەسەبىندەگى قازاقستاندىق اسكەري قىزمەتشىلەردىڭ ءبىرىنشى جاتتىعۋى 15- ماۋسىمعا جوسپارلانعان.