ەلوردادا كوروناۆيرۋس سيمپتومى جوق تاسىمالداۋشىنىڭ جاعدايى ونلايندا باقىلانادى

نۇر- سۇلتان. قازاقپارات - ەلوردادا كوروناۆيرۋس سيمپتومى جوق تاسىمالداۋشىلاردىڭ دەنساۋلىق جاعدايى ونلاين باقىلانادى، دەپ حابارلايدى قازاقپارات قالا اكىمدىگىنە سىلتەمە جاساپ.

نۇر سۇلتاننىڭ مەديتسينا قىزمەتكەرلەرى ناۋقاستاردىڭ دەنساۋلىعىن ونلاين باقىلاپ، كوروناۆيرۋستىڭ اسيمپتوماتيكالىق تاسىمالداۋشىلارىنا بارلىق ماسەلە بويىنشا كەڭەس بەرەدى. ولار ءۇي كارانتينىندە بولۋى كەرەك. ەلوردا اكىمى التاي كولگىنوۆ بارلىق قالالىق جانە جەكە كلينيكالاردىڭ باس دارىگەرلەرىمەن، اۋرۋحانالاردىڭ، تالداۋ ورتالىقتارىنىڭ باسشىلارىمەن جانە قالانىڭ باس سانيتارلىق دارىگەرىمەن ونلاين- كەزدەسۋ وتكىزدى.

«قازىر كوپتەگەن وتىنىشتەر كەلىپ تۇسۋدە، سونىڭ ىشىندە iKomek ورتالىعى دا بار. تۇرعىندار، ۇيدە كارانتيندە تۇرعان جانە اۋرۋ بەلگىلەرى بار ادامداردىڭ دا سۇراقتارى بار. ءار پاتسيەنتپەن جەكە جۇمىس ىستەۋ كەرەك. بۇعان ءبىز جاساعان ەلەكتروندى كارانتيندىك قوسىمشانىڭ كومەگى زور. ءبىراق ءبىرقاتار شاعىم بار. شاعىمداردىڭ كوپشىلىگى № 6, 10 ەمحاناعا جانە «شيپاگەر» وتباسىلىق دەنساۋلىق ورتالىعىنا كەلىپ تۇسەدى. دارىگەرلەر Zoom ارقىلى كوروناۆيرۋستىڭ اسيمپتوماتيكالىق تاسىمالداۋشىلارىمەن ونلاين كەزدەسۋ وتكىزۋى كەرەك. سۇراقتارعا جاۋاپ بەرىپ، ولاردىڭ دەنساۋلىعىن باقىلاپ، پاتسيەنتتەردىڭ ءوزىن- ءوزى وقشاۋلاۋ رەجيمىن ۇستانۋىن قامتاماسىز ەتۋى كەرەك. ناۋقاسپەن كەرى بايلانىسى ءۇشىن باسقا بايلانىس ارنالارىن دا قولدانۋ مۇمكىندىگى بار. سيمپتوم پايدا بولعان جاعدايدا ناۋقاس اۋرۋحاناعا جاتقىزىلۋى ءتيىس. ۆيرۋس ەشقايدا كەتكەن جوق، سوندىقتان قاتاڭ سانيتارلىق نورمالاردى ساقتاۋ كەرەك. ىندەتتىڭ جاڭا تولقىنىنا دايىن بولۋىمىز كەرەك»، - دەدى ەلوردا اكىمى التاي كولگىنوۆ.

ەلوردانىڭ مەديتسينالىق مەكەمەلەرى قاجەتتى ءدارى- دارمەكپەن تولىق قامتاماسىز ەتىلگەن، بارلىق اۋرۋحانادا جەكە قورعانىس قۇرالدارى، دەزينفەكتسيالىق تۋننەل، دارىگەرلىك امبۋلاتوريالاردا سەنسور تەرمومەتر ورناتىلعان. بۇل عيماراتقا كىرگەن ادامداردىڭ بارلىعىنىڭ تەمپەراتۋراسىن الىستان ولشەۋگە مۇمكىندىك بەرەدى. ەلوردا اكىمى التاي كولگىنوۆتىڭ وكىمىمەن ەمحانالار مەن اۋرۋحانالار اۋماعىنداعى دەزينفەكسيالىق تۋننەلدەر مەن تەپلوۆيزورلار سانى ارتادى.

جالپى، نۇر- سۇلتاندا 2644 كوروناۆيرۋس جۇقتىرۋ جاعدايى تىركەلدى. 13 - ماۋسىمداعى جاعداي بويىنشا 1893 ناۋقاس (%70) ەمدەلىپ شىقتى. اۋرۋحانالاردا 700-دەن استام ادام ەمدەلۋدە، ولاردىڭ جارتىسىندا پنيەۆمونيا دياگنوزى راستالدى. وروناۆيرۋستىڭ ناۋقاستارعا زالالى تۇبەگەيلى جويلىپ كەتپەيدى. ينفەكسيا تەك وكپەگە عانا اسەر ەتپەيدى - تىندىك فيبروز تۇرىندە وشاقتار پايدا بولادى، سونىمەن قاتار باۋىرعا، بۇيرەككە، جۇرەككە جانە ميعا اسەر ەتۋى مۇمكىن. قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا سانيتارلىق نورمالاردى قاتاڭ ساقتاۋ كەرەك ەكەنىن اتاپ ءوتتى.

«مىنە، بىرنەشە اي بويى مەديتسينا قىزمەتكەرلەرى قارقىندى رەجيمدە جۇمىس ىستەپ كەلەدى. ازاماتتار تەك وزدەرىنە عانا ەمەس، دارىگەرلەرگە دە كومەكتەسۋى كەرەك. نەمقۇرايلىلىق دەنساۋلىققا زيان تيگىزبەۋى كەرەك. سانيتارلىق نورمالاردى ساقتاماۋ قالالىق اۋرۋحانالاردىڭ تولىپ كەتۋىنە جانە بۇل دارىگەرلەر ءار ناۋقاسقا ۋاقتىلى كومەك كورسەتە الماۋىنا اكەلۋى مۇمكىن. ولاردىڭ ىشىندە ءسىزدىڭ جاقىندارىڭىز دا بولۋى مۇمكىن. ءتىپتى دەنى ساۋ جانە جاس ادامدار دا قارسى تۇرا المايتىن اسا قاۋىپتى ينفەكتسياعا ساقتىقپەن قاراۋ كەرەك»، - دەدى ساۋلە قيسىقوۆا.