ماسكانى ءبىرىنشى كەزەكتە كىمدەر تاعۋى ءتيىس

نۇر- سۇلتان. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆ ماسكا تاعۋ قاجەتتىگى بار توپتاردى اتادى، دەپ حابارلايدى قازاقپارات ءتىلشىسى.

«قازىر وقۋشىلار مەن ستۋدەنتتەر دەمالىستا. وكىنىشكە قاراي، كەز كەلگەن بالا، شاكىرت نەمەسە ستۋدەنت ينفەكسيانى تاسىمالداۋشى بولۋى مۇمكىن. ولار دوستارىمەن كەزدەسەمىن دەپ ءجۇرىپ، ىندەتتى جۇقتىرىپ السا، ۇيدەگى ەگدە جاستاعى اتا- انا، جاسى ۇلكەن تۋىستارىنا ۇلكەن قاۋىپ توندىرەدى. ونىڭ زاردابى دا اۋىر بولماق»، - دەپ جازدى مينيستر الەۋمەتتىك جەلىدەگى پاراقشاسىندا.

وسى ورايدا ول 5 - ماۋسىمدا د د س ۇ حالىقتىڭ ءتۇرلى توپتارىنا ارنالعان ماسكاعا قاتىستى جاڭا ۇسىنىم جاساعانىن ەسكە سالدى. «COVID-19 تارالۋىنىڭ الدىن الۋ ءۇشىن مىندەتتى تۇردە الەۋمەتتىك اراقاشىقتىقتى (كەم دەگەندە 1 مەتر) ساقتاۋ كەرەك. مەديتسينا قىزمەتكەرلەرىنە، رەسپيراتورلىق اۋرۋ سيمپتومدارى بار ادامدارعا، حالىقتىڭ وسال توبىنا كىرەتىن ادامدارعا، سونداي- اق 1 مەتر اراقاشىقتىقتى ساقتاۋعا مۇمكىندىك بولماعان كەزدە ماسكا تاعۋ ۇسىنىلدى. سونىمەن قاتار، د د س ۇ COVID-19 جەڭىل سيمپتومدارى بار ادامدارعا مەديتسينالىق ماسكا تاعۋعا (جانە مەديتسينالىق كومەككە جۇگىنۋ) كەڭەس بەرەدى»، - دەدى ە. ءبىرتانوۆ.

مۇنىمەن قوسا ۆەدومستۆو باسشىسى «د د س ۇ پاندەميا جوق دەپ مالىمدەدى» دەگەن پىكىر قاتە ەكەنىن اتاپ ءوتتى. «سونىمەن، ءسىز «جەكە كارانتين» ەرەجەلەرىنە نەمقۇرايلى قاراماي، جاۋاپكەرشىلىك تانىتساڭىز وتباسىڭىزدىڭ، تۋىس، دوستارىڭىز بەن ارىپتەستەرىڭىزدىڭ، قالا مەن ەلدىڭ قاۋىپسىزدىگىن قامتاماسىز ەتەسىز. ءبىز بىرگە كۇرەسسەك قانا بۇرىنعى ءومىر ءسۇرۋ سالتىمىزعا، جۇمىسقا تەزىرەك ورالامىز، تۋعان- تۋىس، جاقىندارىمىزبەن قاۋىشىپ، ەركىن ءجۇرىپ- تۇرۋعا مۇمكىندىك تۋادى، قايتا ساياحاتقا شىعامىز»، - دەپ ءتۇسىندىردى مينيستر.

بۇدان بۇرىن حابارلانعانداي، مينيستر «جەكە كارانتينگە» قاتىستى پىكىر ءبىلدىردى . سونىمەن قاتار، كوروناۆيرۋسقا قاتىستى 2022 -جىلعا دەيىن الەۋمەتتىك اراقاشىقتىقتى ساقتاۋ تالاپ ەتىلۋى مۇمكىن .

اۆتور: رۋسلان عابباسوۆ