سولتۇستىك قازاقستاندا تايىنشا قالاسى كارانتينگە جابىلادى

پەتروپاۆل. قازاقپارات - سولتۇستىك قازاقستان وبلىسىنداعى تايىنشا قالاسىندا كوروناۆيرۋس ىندەتىنىڭ اسقىنۋىنا بايلانىستى كارانتين شارالارى قاتاڭداتىلىپ، ەلدى مەكەنگە كىرىپ- شىعۋ شەكتەلدى، دەپ حابارلايدى قازاقپارات ءتىلشىسى.

بۇگىن س ق و تاۋارلار مەن كورسەتىلەتىن قىزمەتتەردىڭ ساپاسىن باقىلاۋ دەپارتامەنتىنىڭ باسشىسى سەرىكباي قاسماقاسوۆ ونلاين بريفينگ وتكىزىپ، مالىمدەمە جاسادى. وبلىستىڭ باس سانيتار دارىگەرىنىڭ ايتۋىنشا، 24 - ناۋرىز بەن 13 - ماۋسىم ارالىعىندا س ق و- دا كوروناۆيرۋستى ينفەكسيانى جۇقتىرۋدىڭ 191 دەرەگى تىركەلگەن. ونىڭ 84-ىندە (%44) اۋرۋ بەلگىلەرى بولسا، قالعاندارىندا قاۋىپتى ينفەكسيا تەكسەرۋ بارىسىندا انىقتالعان.

«سوڭعى ۋاقىتتا قاۋىپتى ىندەتتى جۇقتىرۋدىڭ 25 جاعدايى تىركەلدى. ونىڭ 13-ىندە اۋرۋ بەلگىلەرى بولدى. 15- ءى ناۋقاستارمەن بايلانىستا بولسا، 5- ۋى اۋىرىپ، دارىگەرگە قارالعان، 4- ءى رەسەيدەن كەلگەندەردە، ال بىرەۋىنە دياگنوز سكرينينگتەن ءوتۋ بارىسىندا انىقتالىپ، قويىلدى»، - دەدى سەرىكباي قاسماقاسوۆ.

21 جاعداي س ق و تۇرعىندارىنا قاتىستى. 16-سى - پەتروپاۆلدا، ۇشەۋى - تايىنشا، بىرەۋى - قىزىلجار اۋداندارىندا تىركەلدى. ال ءبىر ادام الماتىدان جۇقتىرىپ كەلگەن. «تايىنشا قالاسىندا قاۋىپتى ىندەت سوڭعى ءۇش كۇندە ءتورت رەت تىركەلدى. وسىعان بايلانىستى ەلدى مەكەنگە كىرىپ- شىعۋعا شەكتەۋ قويىلادى، كارانتيندىك شارالار قاتاڭداتىلادى»، - دەدى وبلىستىڭ باس سانيتار دارىگەرى.

پەتروپاۆلدا كوروناۆيرۋستى ينفەكسيانىڭ ءۇش وتباسىلىق وشاعى انىقتالدى. مۇندا التاۋدان سەگىزگە دەيىن جاعداي تىركەلگەن. سىرقاتتاردىڭ جاس ەرەكشەلىكتەرى دە ءارتۇرلى. وسىعان بايلانىستى وبلىس ورتالىعىنداعى بالاباقشا، وقۋشىلار سارايىنىڭ جانە ترەناجەرلىك زالدىڭ جۇمىسى ۋاقىتشا توقتاتىلدى.

اۆتور: اقەركە داۋرەنبەك قىزى