قاپشاعاي سۋ قويماسىنىڭ جاعالاۋىندا دەمالۋعا رۇقسات بەرىلدى

تالدىقورعان. قازاقپارات - قاپشاعاي سۋ قويماسىنا اپاراتىن جولداردا قويىلعان موبيلدى پوستار الىنادى، دەپ حابارلايدى قازاقپارات الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

بۇگىن وبلىستىڭ باس سانيتار دارىگەرىنىڭ كارانتيندى كۇشەيتۋ جونىندەگى جاڭا قاۋلىسى شىقتى. قۇجاتتا بۇرىن ەنگىزىلگەن شەكتەۋلەر سول كۇيىندە ساقتالا بەرەتىنى ايتىلعان. تەك تۋريستىك نىسانداردىڭ جۇمىسىنا جاڭا تالاپتار قويىلدى.

وسىلايشا اقشي اۋىلىنداعى وتباسىلىق امبۋلاتوريادا كەلگەن تۋريستەردى جانە اۋىرعان جەرگىلىكتى حالىقتى پ ت ر- تەستىلەۋدەن وتكىزۋ ءۇشىن كوشپەلى اۆتوزەرتحانا اشۋ تاپسىرىلعان. اۆتوزەرتحانا بارلىق قاجەتتى قۇرال- جابدىقپەن قامتاماسىز ەتىلۋى ءتيىس. سونداي- اق قالا جانە اۋدان، اۋىل اكىمدەرى، تۋريستىك بازالار، دەمالىس ورىندارى ايماققا كىرەر تۇستا دەزينفەكسيالىق تۋننەل ورناتىپ، ءار رەيستەن كەيىن كولىك دەزينفەكسياسىن ۇيىمداستىرۋى ءتيىس. جۇرگىزۋشىلەرگە گيگيەنا ءۇشىن ءتيىستى جاعداي جاسالۋى كەرەك. دەمالۋشىلاردىڭ ۇيىنە قايتقانعا دەيىن نىسان اۋماعىنان شىعىپ، دالا كەزۋىنە تىيىم سالىنادى. قىزمەتكەرلەر مەن دەمالۋشىلاردا دەنە قىزۋى جوق پا، اۋىرىپ قالمادى ما - سونىڭ ءبارىن كۇن سايىن تەكسەرىپ وتىرۋ قاجەت.

ال 100 ادامنان اسا تۋريست كەلەتىن نىسانداردا مەدقىزمەتكەر مەن يزولياتورى بار مەدپۋنكت مىندەتتى تۇردە بولۋى ءتيىس. ودان بولەك، قاپشاعاي سۋ قويماسى جاعالاۋىنا، ىلە اۋدانىنداعى جەتىگەن اۋىل وكرۋگىنە اپاراتىن اۆتوجولداعى موبيلدى پوستار الىنادى. بالالاردى ساۋىقتىرۋ ورتالىقتارى مەن مەكتەپ جانىنداعى لاگەرلەر ازىرگە جۇمىس ىستەمەيدى. بۇل قاۋلى 12 - ماۋسىمنان باستاپ كۇشىنە ەندى.

ەسكە سالا كەتەيىك، بۇعان دەيىن قاپشاعاي سۋ قويماسىنا باراتىن جولدار جابىلعان ەدى.