فرانسيادا پوليتسيا قىزمەتكەرلەرى شەرۋگە شىقتى

نۇر-سۇلتان. قازاقپارات - قۇقىق قورعاۋشىلار كوپشىلىكتىڭ وزدەرىنە دەگەن كوزقاراسىنا نارازى. جۇرت پوليتسەيلەردى جاپپاي ءناسىلشىل ءارى قاتىگەز دەپ ايىپتاعان ەدى.

ءتارتىپ ساقشىلارىنىڭ ەرەۋىلى بۇكىل ەل اۋماعىندا ءوتتى. پوليتسەيلەر جەرگە قول كىسەندەرىن تاستاپ، پرەزيدەنت ماكرونمەن كەزدەسۋدى تالاپ ەتتى. فرانسيادا پوليتسياعا دەگەن سەنىم السىرەپ بارادى. امەريكاداعى ناسىلشىلدىك پەن قاتىگەزدىكتى ايىپتاعان ەۋروپالىقتار ءوز ەلدەرىندە دە قۇقىق قورعاۋ جۇيەسى دۇرىس جۇمىس ىستەمەيتىنىن العا تراتۋدا.

فابيان ۆانەمەلريك، ۇلتتىق پوليتسيا اليانسىنىڭ باس حاتشىسى:

- مۇندا جاي كەلگەن جوقپىز. شىدامىمىز ءبىتتى. پوليتسياعا نەگىزسىز جالا جاپقانداردان شارشادىق. ءوز ءۋاجىمىزدى جەتكىزۋگە جينالدىق.

ءتارتىپ ساقشىلارى پرەزيدەنتتەن قولداۋ سۇراپ وتىر. سەبەبى جۋىردا سالا باسشىسىنىڭ ءوزى قاتارداعى ارىپتەستەرىنىڭ ناسىلشىلدىككە ەرىك بەرەتىنىن ايتىپ، ايىپتاعان ەدى. وفيتسەرلەر ءمينيستردىڭ بۇل قىلىعىن ساتقىندىققا تەڭەپ وتىر.

داۆيد، پوليتسيا قىزمەتكەرى:

- ءبىزدى ءتۇرلى دارەجەگە جىكتەپ، تاڭبالاۋ قازىر ادەتكە اينالدى. بۇعان قارسى شىعۋىمىز كەرەك. پوليتسيا ءناسىلشىل ەمەس، وسىنى جەتكىزۋىمىز قاجەت. وسىدان بەس جىل بۇرىن ءبىزدى قاھارمان رەتىندە قادىر تۇتىپ ەدى، ەندى قازىر تۇككە جارامايتىن بولعانىمىز با؟

نارازىلىق شەرۋىنىڭ ماقساتى - قۇقىق قورعاۋشىلاردىڭ ار- ابىرويىن اقتاۋ جانە ىشكى ىستەر ءمينيسترىن قىزمەتىنەن كەتىرۋ. پوليتسيا قىزمەتكەرلەرى حالىقتان بوس ايىپتاۋدى دوعارىپ، ورتاق مامىلەگە كەلۋدى سۇراپ وتىر.

www.24.kz