اۆستراليا عالىمدارى ويلاپ تاپقان دارىگە ءۇمىت ارتىپ وتىر

نۇر-سۇلتان. قازاقپارات - اۆستراليا عالىمدارى ويلاپ تاپقان جاڭا ءدارى كوروناۆيرۋس جۇقتىرعان ناۋقاستارعا وڭ اسەر ەتۋى ءتيىس.

بۇل جۇرەك زەرتتەۋ ينستيتۋتىنىڭ پروفەسسورى شون دجەكسوننىڭ پىكىرى. ول ينسۋلتتى ەمدەۋگە ارنالعان جاڭا پرەپاراتتى شىعارۋمەن اينالىسىپ جاتقان زەرتتەۋ توبىنىڭ جەتەكشىسى.

بۇل ءدارى ميداعى قان اينالىمىنىڭ بۇزىلۋىنا اكەلەتىن قان ۇيۋىنا جول بەرمەيدى. ونىڭ ايتۋىنشا، كوۆيد-19 اۋرۋى اسقىنعان ناۋقاستاردىڭ كوبىسىندە قان ۇيىپ، ترومبتار پايدا بولادى. وسىنىڭ سالدارىنان تىنىسى تارىلىپ، ىشكى اعزالارى سىر بەرەدى. عالىمدار بۇل ءدارىنى جەڭىل تۇردە اۋىرعان 72 ناۋقاسقا قولدانىپ، كلينيكالىق سىناعىنىڭ ءبىرىنشى كەزەڭىن ءساتتى وتكىزدى. ەندى سىرقاتى اسقىنعان ناۋقاستارعا تەكسەرمەك. الايدا سىناقتىڭ ەكىنشى كەزەڭىن شەتەلدە وتكىزۋ قاجەت. ويتكەنى بۇكىل قۇرىلىقتى الىپ جاتقان اۆستراليادا ىندەتتىڭ بەتى قايتىپ، وكپەنى جاساندى جەلدەتۋ اپپاراتتارىنا قوسىلعان اۋىر حالدەگى ناۋقاس جوق.

شون دجەكسون، جۇرەك زەرتتەۋ ينستيتۋتىنىڭ عىلىمي ديرەكتورى:

- ەگەر قاننىڭ ۇيۋىن توقتاتساق، COVID-19-دى ادام ومىرىنە قاۋىپتى دەرتتەن كادىمگى رەسپيراتورلىق اۋرۋلار قاتارىنا قوسا الامىز. ياعني ەمدەۋ ءۇشىن وكپەنى جاساندى تۇردە جەلدەتۋدىڭ قاجەتى بولمايدى. قولىمىزدان كەلسە بۇل بۇكىل جاعدايدى وزگەرتىپ، دۇنيە ءجۇزىنىڭ دەنساۋلىق ساقتاۋ جۇيەسىنە زور اسەر ەتەدى.

www.24.kz