قازاقپارات ءتىلشىسى ەلباسىنىڭ العىس حاتىمەن ماراپاتتالدى
ماراپات العان ەرىكتىلەر اراسىندا قازاقپارات ءتىلشىسى ايجان سەرىكجان قىزى دا بار.
«ەلباسى نۇرسۇلتان نازاربايەۆتىڭ باستاماسىمەن قۇرىلعان «Biz Birgemiz» قورىنىڭ جەلىسىمەن جانە مەتسەناتتاردىڭ قولداۋىمەن ت ج كەزەڭىندە اسا مۇقتاج وتباسىلارعا جاردەم كورسەتىلدى. وسىناۋ جۇمىستاردى اتقارۋدا ۆولونتەرلارىمىزدىڭ ءرولى زور بولدى. رەسپۋبليكا بويىنشا ەرىكتىلەر 250 مىڭنان استام وتباسىعا ازىق- تۇلىك سەبەتتەرىن، ماسكالار مەن ەڭ قاجەتتى زاتتاردى جەتكىزدى. سونىمەن قاتار، جاسوتاندىقتار ماقتاارال اۋدانىنا اتتانىپ، تاسقىن سۋدان زارداپ شەككەن اۋىل تۇرعىندارىنا كومەك كورسەتىپ جاتىر. بۇل جۇمىس ارقىلى سىزدەر ءوز وتانشىلدىقتارىڭىزدى، ازاماتتىق پوزيتسيا مەن جاناشىرلىقتارىڭىزدى تانىتا وتىرىپ، جاستارعا ۇلگى كورسەتتىڭىزدەر»، - دەدى «Jas Otan» جاستار قاناتىنىڭ جەتەكشىسى ەلنۇر بەيسەنبايەۆ ماراپاتتاۋ سالتاناتىندا.
ونىڭ ايتۋىنشا، توتەنشە جاعداي كەزىندە ەلىمىزدە بەس مىڭعا جۋىق ەرىكتى تىنىمسىز ەڭبەك ەتتى. ونىڭ اراسىنان ەڭ بەلسەندى جۇمىس ىستەگەن 3 مىڭ قازاقستاندىق ەلباسى العىس حاتىمەن ماراپاتتالماق.
«اپتا بويى رەسپۋليكانىڭ بارلىق ايماقتارىندا اكىمدەر ەلباسى العىس حاتىن تابىستايتىن بولادى. نۇر- سۇلتان قالاسىنداعى سالتاناتتى شارانى Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەك باستادى، ول ەڭ بەلسەندى جاس ۆولونتەرلەردى ماراپاتتادى. ەكىنشى كۇنى «Biz Birgemiz» اكسياسىنا كومەكتەسكەن تانىمال تۇلعالار ماراپات الدى. مۇنى دا ءتۇسىنۋ قاجەت، انشىلەر، شوۋ- بيزنەس وكىلدەرى ءبىزدىڭ قاتارىمىزدا كوپ جۇرمەسە دە، بىزگە اقپاراتتىق قولداۋ كورسەتتى. مەتسەناتتاردى تابۋعا، اتقارعان جۇمىستارىمىزدى الەۋمەتتىك جەلىدە جاريالاۋعا، جۇرتشىلىقتى قايىرىمدىلىققا شاقىرۋعا قول ۇشىن بەردى. ەندى بۇگىن ءۇشىنشى لەكتە - تىكەلەي نۇر- سۇلتان قالاسىندا اكسيامىزعا اقپاراتتىق قولداۋ كورسەتكەندەر، اۆتوۆولونتەرلەر، ەرىكتى ۇيلەستىرۋشىلەرى، قايىرىمدىلىق قورلارى مەن جەكە كومپانيالاردىڭ وكىلدەرى شاقىرىلدى. جالپى نۇر- سۇلتان قالاسىندا ماراپاتقا لايىق بولعان 600-گە جۋىق ۆولونتەر بار. كارانتين بولعاندىقتان، ولاردى 30 ادامنان توپتاستىرىپ، بولەك- بولەك شاقىرىپ جاتىرمىز»، - دەدى ە. بەيسەنبايەۆ.
ەسكە سالا كەتسەك، Nur Otan پارتياسىنىڭ كوشباسشىسى نۇرسۇلتان نازاربايەۆ قازاقستاندىق ۆولونتەرعا ءوز ىقىلاسىن ءبىلدىرىپ، العىس حاتتارعا قول قويعان ەدى.
فوتو: jasotan.kz
