قارجى ءمينيسترى قازاقستان مەن قىتاي كەدەندىك مالىمەتتەرىنىڭ ايىرماشىلىعىنا پىكىر ءبىلدىردى

نۇر- سۇلتان. قازاقپارات - قارجى ءمينيسترى ەرۇلان جاماۋبايەۆ قازاقستان مەن قىتايدىڭ كەدەندىك مالىمەتتەرىنىڭ ايىرماشىلىعىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بۇل - ءبىز ءۇشىن ماڭىزدى ماسەلە. كەدەن بەكەتتەرىندەگى بۇكىل اقپارات جولداناتىن سيتۋاتسيالىق ورتالىقتى دا قۇرىپ قويدىق. وعان تۇراقتى تۇردە مونيتورينگ جۇرگىزىلەدى. تاۋەكەلدەردى باسقارۋ جۇيەسىن جەتىلدىرىپ، دەكلاراتسيالاناتىن تاۋارلاردىڭ باعاسىن باقىلاۋ ماقساتىندا 6 مىڭ باعالىق ينديكاتورلاردى ەنگىزدىك»، - دەدى ەرۇلان جاماۋبايەۆ حالىق الدىندا ەسەپ بەرۋدەن كەيىن و ك ق- دا ۇيىمداستىرىلعان باسپا ءسوز ءماسليحاتىندا.

قارجى ءمينيسترى ايىرماشىلىق انىقتالعان جاعدايدا كاسىپكەرلەر قوسىمشا كەدەندىك باجى تولەيتىنىن ءمالىم ەتتى.

«سونىمەن قاتار، قىتاي تاراپىمەن ەكسپورتتىق- يمپورتتىق وپەراتسيالار بويىنشا اقپاراتتاردى الماسۋ فورماتى تۋرالى كەلىسىمگە كەلدىك. ازىرگە بۇل مالىمەتتەردىڭ راستىعىن ءالى دە انىقتاۋ كەرەك. الايدا ءوزارا الماسقان اقپاراتتاردىڭ ساپاسىن جاقسارتۋ ءۇشىن جۇمىس اياسىن كەڭەيتەمىز. سونىمەن بىرگە، قىرعىز رەسپۋبليكاسىمەن جانە قىتايمەن شەكاراداعى وتكىزۋ بەكەتتەرىن بارىنشا جاڭعىرتامىز. تولىققاندى سيفرلاندىرۋ شىنايى اقپاراتتى الۋ ءۇشىن ايتارلىقتاي كومەك بولارى ءسوزسىز»، - دەدى ول.

قارجى ءمينيسترى قولعا الىنعان شارالاردىڭ ارقاسىندا وتكەن جىلى ق ح ر- مەن كەدەندىك ستاتيستيكاداعى ايىرماشىلىق 53-تەن 48 پايىزعا ازايعانىن ءمالىم ەتتى.

اۆتور: ايان بەكەن ۇلى