قازاقستاندا جىلقى، قوي مەن ءىرى قارا كوبەيىپ، ەشكى سانى ازايعان

نۇر-سۇلتان. قازاقپارات - قازاقستاندا ءىرى قارا، ۇساق مال، جىلقى مەن تۇيە سانى كوبەيىپ، ەشكى مەن قۇس سانى ازايعان.

قازاقپارات بۇل تۋرالى energyprom.kz اقپارات كوزىنە سىلتەمە جاساپ حابارلايدى.

nergyprom.kz اقپارات كوزىنىڭ زەرتتەۋىنە سۇيەنسەك، جالپى ەلدەگى مال شارۋاشىلىقتارى جىل باسىنان بەرى ءتورت ايدىڭ ىشىندە 657 ميلليارد تەڭگەنىڭ ءونىمىن شىعارعان. بۇل - ءبىر جىل بۇرىنعى كورسەتكىشتەن 2,3 پايىزعا ارتىق.

«2020 -جىلدىڭ قاڭتار- ءساۋىر ايلارىندا مال شارۋاشىلىعىنىڭ جالپى ىشكى ءونىمى 657,1 ميلليارد تەڭگەگە جەتتى. ەڭ جوعارى كورسەتكىشتەر الماتى وبلىسىندا تىركەلىپ، ءتورت ايدىڭ ىشىندە وندا 106,4 ميلليارد تەڭگەنىڭ ءونىمى وندىرىلگەن. مال شارۋاشىلىعىنان ەداۋىر پايدا تاپقان ۇزدىك ءۇش وڭىرگە تۇركىستان وبلىسى (90,8 ميلليارد ت گ، %2,8+) مەن شىعىس قازاقستان وبلىسى (81,9 ميلليارد ت گ، %1,6+) ەنگەن. ال ۇكىمەتتىڭ حابارلاۋىنشا قازاقستاننىڭ مال شارۋاشىلىعىندا تۇراقتى ءوسىم ساقتالىپ وتىر.

وسى جىلدىڭ قورىتىندىسى بويىنشا سالانىڭ جالپى ىشكى ءونىمىن 2,6 تريلليون تەڭگەگە، ءىرى قارا باسىن 7,8 ميلليونعا، ۇساق مالدىڭ سانىن 17,5 ميلليونعا جەتكىزۋ جوسپارلانىپ وتىر. الداعى ۋاقىتتا قوسىمشا 105 مىڭ توننا قۇس ەتىن وندىرەتىن قوسىمشا قۇس فابريكاسى سالىنادى. سونىمەن قاتار قازىرگى قۇس فابريكالارىنىڭ دا ءوندىرىسىن ارتتىرۋ كوزدەلگەن. بۇل رەتتە ەلدىڭ ءوز قاجەتتىلىگىنە باسا ءمان بەرىلەتىنىن اتاپ ءوتۋ كەرەك.

«1-مامىرداعى كورسەتكىش بويىنشا ەلدەگى ءىرى قارا سانى 8,8 ميلليون باسقا جەتتى. ءبىر جىل بۇرىنعى كورسەتكىشتەن 4,1 پايىزعا ءوسىپ وتىر. ال قوي سانى 22,3 ميلليلونعا (%2,7+)، جىلقى 3,2 ميلليونعا (%7,6+)، تۇيە سانى 243,2 مىڭعا (%4,1+)، شوشقا سانى 933,4 مىڭعا (ءبىر جىل بۇرىنعى كورسەتكىشتەن %1,6+) جەتكەن. ال ەشكى سانى كەرىسىنشە 3 ميلليون باسقا (%1,4-) ازايىپ، قۇس سانى 45,2 ميلليونعا (%0,8-) كەمىگەن» دەلىنگەن حابارلامادا.