كوروناۆيرۋس تۋرالى ءبىرىنشى بولىپ ەسكەرتكەن ۋحاندىق دارىگەردىڭ ايەلى ساۋ بالانى دۇنيەگە اكەلدى

نۇر -سۇلتان. قازاقپارات - كوروناۆيرۋس تۋرالى ءبىرىنشى بولىپ ەسكەرتكەن ۋحاندىق دارىگەردىڭ ايەلى دەنى ساۋ بالانى دۇنيەگە اكەلدى، - دەپ حابارلايدى ريا نوۆوستي.

«پەنپاي» مالىمەتىنشە، ايەل مەن ءسابيدىڭ جاعدايى قازىر جاقسى، بالانىڭ دەنى ساۋ. ۋحاندىق دارىگەردىڭ ايەلى فۋ سيۋەتسزە WeChat الەۋمەتتىك جەلىسىندەگى پاراقشاسىندا «جولداسىم، جۇماقتا كوردىڭ بە ءسابيدى؟ سەنىڭ ماعان جاساعان سوڭعى سىيلىعىڭ بۇگىن دۇنيەگە كەلدى» دەپ جازعان ەكەن.

ەسكە سالايىق، ۋحاننىڭ ورتالىق اۋرۋحاناسىنىڭ دارىگەرى بىلتىر 30-جەلتوقساندا ارىپتەستەرىنە تەڭىز ونىمدەرى ساتىلاتىن «حۋانان» بازارىندا جەتى بىردەي وقيعا تىركەلگەنىن ايتقان. ول جاڭا كوروناۆيرۋس باسقا شتام تۇرىنە جاتاتىنىن بىلمەگەن. دارىگەردىڭ جازباسى جەلىدە تاراپ كەتكەن بولاتىن.

ءتۇن ۋاقىتىندا ۋحانداعى دەنساۋلىق ساقتاۋ باسقارماسىنىڭ شەنەۋنىكتەرى دارىگەردى شاقىرىپ، نەلىكتەن قاۋەسەت تاراتىپ جۇرگەنىن ءتۇسىندىرۋدى تالاپ ەتكەن. ارتىنشا دارىگەر پوليتسيادان رەسمي ەسكەرتۋ الىپ، وعان قوعامدىق تولقۋ تۋدىرۋى مۇمكىن قاۋەسەتتى تاراتتى دەگەن جەلەۋمەن ايىپ تاعىلعان ەدى.

الايدا تەك ءبىر ايدان كەيىن قىتايدىڭ جوعارى سوتى بۇل اقپاراتتى جاسىرىپ قالۋدىڭ قاجەتى جوعىن مويىنداعان. ال دارىگەر بۇل ۋاقىت ارالىعىندا ناۋقاستارعا كومەك كورسەتۋىن جالعاستىرعان. 10 -قاڭتاردا لي ۆەنليان ءوزىن ناشار سەزىنگەن، سونىمەن قاتار، ونىڭ تۋىستارى دا اۋىرىپ قالعان. ءبىرىنشى اقپاندا دارىگەر 2019-nCoV ۆيرۋسىن جۇقتىرعانىن ايتقان. كەيىن دارىگەردىڭ قايتىس بولعانى حابارلاندى.