اتى اڭىزعا اينالعان كوبي برايانتقا «ەممي» سىيلىعى بەرىلدى

نۇر-سۇلتان. قازاقپارات - بيىلعى جىلدىڭ قاڭتارىندا قازا تاپقان ۇلتتىق باسكەتبولشىلار قاۋىمداستىعى (ۇ ب ق) كلۋبى «لوس-اندجەلەس لەيكەرستىڭ» بۇرىنعى قورعاۋشىسى، كوبي برايانت «ەممي» سىيلىعىنىڭ لاۋرەاتى اتاندى.

بۇل تۋرالى امەريكالىق تەلەۆيدەنيە اكادەمياسى Twitter-دە جازدى، دەپ حابارلايدى قازاقپارات. ماراپات امەريكالىققا لوس-اندجەلەستى دامىتۋعا قوسقان ۇلەسى ءۇشىن بەرىلىپ وتىر. برايانت 26-قاڭتاردا جەكە تىكۇشاعىنىڭ اپاتقا ۇشىراۋى سالدارىنان مەرت بولدى. ول 13 جاسار قىزىمەن دجياننامەن بىرگە باسكەتبولدان جاسوسپىرىمدەر ماتچىنا بارا جاتقان. بورتتاعى توعىز جولاۋشىنىڭ ءبارى قازا تاپتى. برايانت ءوزىنىڭ سپورتتىق جولىندا «لوس-اندجەلەس لەيكەرس» كلۋبىندا ونەر كورسەتتى. كوماندامەن بىرگە ۇلتتىق باسكەتبول قاۋىمداستىعىنىڭ بەس رەت چەمپيوندىق تيتۋلىن جەڭىپ الدى. ول ەكى دۇركىن وليمپيادا التىنىنىڭ يەگەرى.

ايتا كەتكەن ءجون، «ەممي» ا ق ش-تا تەلەۆيدەنيە سالاسىنداعى باستى ماراپات. ونى ءار جىل سايىن امەريكالىق تەلەۆيدەنيە اكادەمياسى تاپسىرادى.