باس ءمۇفتي پاۆلودار وبلىسى اكىمدىگىنەن قولداۋ سۇرادى

نۇر- سۇلتان. قازاقپارات - بۇگىن قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى پاۆلودار وبلىسىنىڭ اكىمى ءابىلقايىر سقاقوۆ كەزدەستى، دەپ حابارلايدى قازاقپارات ءتىلشىسى.

«پاۆلودار وبلىسىنداعى ءدىني احۋال مەنىڭ ءجىتى نازارىمدا. قازىر بۇل وڭىردە 96 مەشىتىمىز بار. 96 مەشىتتە 132 ءدىن قىزمەتكەرى جۇمىس ىستەيدى. وسى رەتتە، بىرىنشىدەن، ءدىن قىزمەتكەرلەرىنىڭ اقپاراتتىق- ناسيحاتتىق جۇمىستارىنا اكىمدىك تاراپىنان قولداۋ كورسەتىلسە دەگەن تىلەگىم بار. ويتكەنى، حالىققا دۇرىس ءدىني اقپارات تاراتۋ - بارشاعا ورتاق ءىس. ەكىنشىدەن، يمام- مولدالاردىڭ ءدىني ءبىلىمى مەن تاجىريبەسىن ارتتىرۋ باعىتىنداعى شارالارىمىزعا دا قولداۋ كورسەتىلسە يگى ءىس بولار ەدى. ءبىزدىڭ ماقساتىمىز ورتاق: حالىقتىڭ يگىلىگى مەن بىرلىگى ءۇشىن قىزمەت ەتۋ. اللا تاعالا ورتاق ماقساتتاعى جۇمىسىمىزعا جار بولسىن»، - دەدى باس ءمۇفتي ناۋرىزباي قاجى تاعان ۇلى.

كەزدەسۋدە وبلىس اكىمى ءابىلقايىر سقاقوۆ ءدىن قىزمەتكەرلەرىنىڭ ءبىلىمىن ارتتىرۋ، جاستار اراسىندا ءدىني اعارتۋشىلىق شارالاردى جۇرگىزۋ، ءدىن مەن ءداستۇر ساباقتاستىعىن ناسيحاتتاۋ جۇمىستارىندا ىنتىماقتاستىقتى ارتتىرۋعا نيەت ءبىلدىردى. باسقوسۋدا كيەلى ءوڭىردىڭ ءتول پەرزەنتى، عۇلاما ءماشھۇر ءجۇسىپتىڭ مۇراسى مەن ونەگەلى ءومىرىن وسكەلەڭ ۇرپاققا ناسيحاتتاۋدىڭ ماڭىزدىلىعى ءسوز بولدى. باس ءمۇفتي مەن وبلىس اكىمى وسى باعىتتا بىرلەسكەن جوبالاردى جۇزەگە اسىرۋعا ۋاعدالاستى.

ق م د ب باسپا ءسوز قىزمەتىنىڭ مالىمەتىنشە، رەسمي كەزدەسۋگە ق م د ب تاراپىنان اپپارات باسشىسى عىلىمبەك جادىگەر ۇلى، ق م د ب ۋاعىز- ناسيحات ءبولىمىنىڭ مەڭگەرۋشىسى باتىرجان بەردەن ۇلى، پاۆلودار وبلىسىنىڭ باس يمامى جولداس قوسپاق ۇلى قاتىستى.

اۆتور: مارلان جيەمباي