ەتنوسارالىق قارىم- قاتىناستارداعى مەملەكەتتىك ساياسات تۇجىرىمداماسى ازىرلەندى

نۇر- سۇلتان. قازاقپارات - قازاقستاندا ەتنوسارالىق قارىم- قاتىناستارداعى مەملەكەتتىك ساياسات تۇجىرىمداماسى جوباسى ازىرلەندى. بۇل تۋرالى ق ح ا ءتوراعاسىنىڭ ورىنباسارى جانسەيىت تۇيمەبايەۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىمەن ەتنوسارالىق قاتىناستار سالاسىنداعى مەملەكەتتىك ساياساتتىڭ تيىمدىلىگىن ارتتىرۋ شارالارى قابىلداندى. ق ر اقپارات جانە قوعامدىق دامۋ مينيسترلىگى ەتنوسارالىق قاتىناستى دامىتۋ كوميتەتى قۇرىلدى. ق ر پرەزيدەنتى جانىنداعى «قوعامدىق كەلىسىم» ك م م ق ر ۇكىمەتىنە بەرۋ جولىمەن قايتا قۇرىلدى. وكىلەتتى باسقارۋ ورگانى بولىپ اقپارات جانە قوعامدىق دامۋ مينيسترلىگى بەكىتىلدى. ەتنوسارالىق قاتىناستار سالاسىنداعى مەملەكەتتىك ساياسات تۇجىرىمداماسى جوباسى جاسالدى»، - دەدى ج. تۇيمەبايەۆ ق ح ا عىلىمي- ساراپتامالىق كەڭەسىنىڭ وتىرىسىندا.

ونىڭ ايتۋىنشا، ايماقتىق دەڭگەيدە ىشكى ساياسات ماسەلەلەرىن ءبىر ورىنباسارعا جۇكتەۋ ماقساتىندا نۇر- سۇلتان، الماتى، شىمكەنت قالالارى مەن وبلىس اكىمدەرىنىڭ ورىنباسارلارى اراسىندا قىزمەتتەردى ءبولۋ جۇمىستارى ءجۇرىپ جاتىر.

«ەتنوسارالىق قاتىناستاردى دامىتۋ ماسەلەلەرى بويىنشا اكىمدىكتەردىڭ ىشكى ساياسات جانە قوعامدىق دامۋ باسقارمالارى قۇرامىندا جەكە بولىمشەلەر قۇرىلۋدا. اسسامبلەيا مەن «قوعامدىق كەلىسىم» ك م م ايماقتىق حاتشىلىقتارى ىشكى ساياسات باسقارماسىنا بەرىلدى. وڭىرلىك اسسامبلەيالار ءتوراعالارىنىڭ ورىنباسارلارى اكىمنىڭ ىشكى ساياسات جونىندەگى ورىنباسارى بولادى»، - دەدى ج. تۇيمەبايەۆ.

سونىمەن بىرگە، سپيكەر قولدانبالى ەتنوساياسي زەرتتەۋلەر ينستيتۋتىنىڭ قىزمەتى جونىندە باياندادى.

«ينستيتۋتتىڭ نەگىزگى قىزمەتى ەتنوسارالىق قاتىناستار سالاسىندا جۇرگىزىلەدى. ينستيتۋت ديرەكتورى قىزمەتىنە بەلگىلى ساياساتتانۋشى جانە تاجىريبەلى مامان تالعات قاليەۆ تاعايىندالعانىن بىلەسىزدەر. جاڭا ينستيتۋت الدىندا ماڭىزدى مىندەتتەر تۇر. ەگەر جاڭا ينستيتۋت اسسامبلەيانىڭ عىلىمي- ساراپتامالىق كەڭەسىنىڭ جۇمىس ورگانىنا اينالسا دۇرىس بولادى دەپ ويلايمىن. ينستيتۋت اقپاراتتىق- تالدامالى ماتەريالداردى دايىنداۋ كەستەسىن جانداندىرىپ، مونيتورينگ ونىمدەرىن جانە سۇرانىسقا يە باسقا دا ماتەريالداردى دايىنداۋدى ۇيىمداستىرۋى كەرەك. ينستيتۋت اسسامبلەيانىڭ عىلىمي- ساراپتامالىق كەڭەسىمەن بىرلەسىپ، ەلدەگى ەتنوسارالىق قاتىناستاردى عىلىمي تۇرعىدان پايىمداۋ بويىنشا ماڭىزدى جۇمىستاردى جاڭا دەڭگەيگە كوتەرەرىنە سەنىمدىمىن»، - دەدى جانسەيىت تۇيمەبايەۆ.

اۆتور: ايجان سەرىكجان قىزى