جىلقى شارۋاشىلىعىنا قانداي سۋبسيديالار بەرىلەتىندىگىن جاريالاندى
«1991 -جىلى قازاقستانداعى بارلىق ساناتتاعى شارۋاشىلىقتاردا جىلقى سانى شامامەن 1,7 ميلليون باس بولدى. ودان كەيىنگى نارىقتىق ەكونوميكاعا كوشۋ كەزىندە مال سانى كۇرت ازايىپ، 2000 -جىلعا قاراي رەسپۋبليكاداعى جىلقى سانى ميلليونعا دا جەتپەي قالدى. مەملەكەت 2002 -جىلدارى قولداۋ كورسەتە باستاعاننان كەيىن مال سانىندا ءوسىم بايقالدى. 2011 -جىلى اسىل تۇقىمدى جىلقىلاردى ساتىپ الۋعا، قىمىز بەن جىلقى ەتىن وندىرۋگە سۋبسيديا تۇرىندەگى مەملەكەتتىك قولداۋ ىسكە قوسىلدى. قابىلدانعان شارالاردىڭ ناتيجەسىندە قازاقستاندا بۇگىنگى تاڭدا جىلقى سانى 2,9 ميلليون باسقا دەيىن ءوستى. بۇل 1991 -جىلعى جىلقى سانىنان 1,7 ەسە، ال 2000 -جىلمەن سالىستىرعاندا 3 ەسە كوپ»، - دەپ اتاپ وتەدى مينيسترلىكتەن.
سونىڭ ناتيجەسىندە ەلىمىزدە جىلقى شارۋاشىلىعى مەن بيە ءسۇتىنىڭ ءوندىرىسى دامىپ، اسىل تۇقىمدى جىلقىلاردىڭ سانى ارتتى. 2011 -جىلدان باستاپ مەملەكەت ساتىپ الۋدى سۋبسيديالاپ، ولاردىڭ ۇلەسى 1,9 ەسە ءوستى. بۇگىنگى تاڭدا مەملەكەت جىلقى شارۋاشىلىعىمەن اينالىساتىن وتاندىق تاۋار وندىرۋشىلەرگە قولداۋ كورسەتۋدى جالعاستىرۋدا.
اتاپ ايتقاندا، ساتىپ الىنعان اسىل تۇقىمدى ايعىرلار ءۇشىن سۋبسيديالاۋ نورماسى ءار باسقا 100 مىڭ تەڭگەدەن؛ بيە ءسۇتىن وندىرۋشىلەر ءۇشىن ءار ليترىنە 60 تەڭگەدەن؛ اسىل تۇقىمدى جىلقىنىڭ انالىق باسىن باعۋعا، جەم- شوبىنە جىلىنا 20 مىڭ تەڭگەدەن جانە جىلقى شارۋاشىلىعىن دامىتۋعا ارنالعان تەحنيكالار مەن جەم- ءشوپ دايىندايتىن جابدىقتاردى ساتىپ العاندا مەملەكەت 25 پايىزدىق وتەۋ ۇلەسىمەن ينۆەستيتسيالىق سۋبسيديا بەرەدى.
بۇل قولداۋ شارالارىنىڭ بارلىعى جىلقى فەرمالارى مەن سالالىق قاۋىمداستىقتاردىڭ ۇسىنىستارى بويىنشا جاسالعان. جالپى العاندا، 2019 -جىلى 4,7 مىڭ جىلقى فەرمالارى مەملەكەتتىك قولداۋ شارالارىمەن قامتىلدى.
«سونىمەن قاتار، جوعارىدا اتالعان قولداۋ شارالارىنا قوسىمشا، جىلقى وسىرۋشىلەرگە «جىلقى ساتىپ الۋعا» 10 جىلعا دەيىنگى 6 پايىزدىق جىلدىق جەڭىلدەتىلگەن نەسيە بەرۋ قاراستىرىلعان. 2016 -جىلدان بەرى «قۇلان» باعدارلاماسى جۇمىس ىستەپ كەلەدى. 2018 -جىلى 12 مىڭ باس مال ساتىپ الۋعا 512 شارۋاشىلىق قاراجات الدى. بىلتىر 1440 شارۋاشىلىققا 40 مىڭنان استام جىلقى ساتىپ الۋعا جەڭىل نەسيە بەرىلدى. 2020 -جىلى قارجىلىق قولداۋ الۋشىلاردىڭ سانى ەداۋىر ارتادى دەپ كۇتىلۋدە. بۇل رەتتە جىلقى ەتى - تەك ىشكى نارىققا باعىتتالعان ءونىم ەكەنىن اتاپ وتكەن ءجون. ەكسپورتتىق نارىق مۇلدە جوق دەۋگە دە بولادى»، - دەلىنگەن ۆەدومستۆو مالىمەتىندە.
اۆتور: مارلان جيەمباي
